藍莓芝士蛋糕~

如果大家仲記得, 之前整了一個tiramisu蛋糕俾老公, 其實當時買材料時, 買多了一盒cream cheese同cream, 2盒都就嚟到期, 於是又的起心肝整個蛋糕~ 今次老公就想要個藍莓芝士蛋糕, 又試一試先~

今次都係參考了"美味DIY"入面的"藍莓芝士凍餅"食譜: http://www.rthk.org.hk/elearning/dessert/cake_bbcheesecake.htm~ 入面有材料同詳細做法, 以及示範短片~~

自己跟了大部份材料同份量, 不過今次試吓餅底用Oreo餅, 有些份量又少啲 (例如少啲魚膠粉水), 有些又多啲 (例如藍莓jam落多啲, 因為鍾意食)~~

俾個成品切件大家睇吓先~

首先預備好各樣材料同餅模 (6吋)~ cream cheese最好放在室溫變軟 (約30分鐘), 令之後容易攪拌~~

先整餅底~~ 將啲oreo餅擺入去密實袋, 當然要先挑走啲cream~ 之後就用重物/木棒將它們打碎~~ 要用好多力架~~ 不過自己鍾意冇咁碎, 於是留番啲大粒~~

之後將牛油隔水整溶, 然後混合餅碎同牛油溶液, 將混合物壓在餅模底~~ 之後將個餅模放入雪櫃備用, 可以雪凍個餅模同雪實啲餅碎~~

之後就打cream~~ 開了冷氣+開到打蛋器最大馬力, 好快打到6、7成~~

然後將芝士、糖同藍莓果醬混合 (上圖紫色部份), 加入魚膠粉水 (魚膠粉+溫水, 隔水整溶撈好), 再加入打好的cream攪拌~~

混合中~~ 顏色愈來愈淺色, 其實咁都幾好睇~~ 可能下次整唔駛撈得太平均, 就咁倒入餅模, 可能就有"雲石"效果~~

之後倒哂入餅模, 擺入雪櫃雪幾個鐘~~

完成啦~~~ 因為剩了一堆oreo餅碎, 所以倒上去為裝飾~~ 因為今次加少了魚膠粉水, 所以質感黏黏的, 少少溶, 不過食落好軟滑, 有啲似雪糕~~

加埋一粒粒藍莓就正式上枱~~ 自覺味道都不錯, 藍莓味同芝士味都好濃~~ 不過食了幾日真係好飽哩, 要等多段時間再整啦~~~