第一次去健康院 (13w)~

近來都是不停記低關於bb的事, 始終第一次, 甚麼都覺得新鮮, 希望唔會悶親大家啦~ 另外自己屋企人都比較傳統, 有了bb之後, 什麼外遊、行遠啲都話唔好, 看來都要等到秋天冇咁熱的時候, 先可以近近哋去郊野啦~

說回檢查, 暫時都係講到呢度, 看來我的blog要繼續努力追上~

去健康院可算享受納稅人福利的時候~ 雖然人人都話健康院的產檢又冇得照超聲波, 又冇咩特別服務, 不過個人覺得多一些醫護人員了解BB的健康, 以及之後去公院生產時, 醫生、護士都可以根據健康院的記錄知道自己同BB的情況, 所以決定去啦~

去到的時候已經係排第10個了, 估唔到同上次看OSCAR一樣~ 等了一會, 先去驗小便、磅重、度高同量血壓~ 樣樣都OK, 除了體重, 比平時輕了少少, 其實得零點幾, 不過姑娘都有細心地問點解輕咗, 可惜自己都唔知點答, 不過應該冇事掛……不過第時愈來愈重才是正常, 所以都希望自己體重可以有增加~

之後等了一會就見護士, 不過老公唔準一齊聽, 難為他在出面悶了半個鐘~ 因為第一次覆診, 所以護士問了詳細的背景資料, 例如同健康有關的資料、病歷等~ 個人覺得姑娘很細心, 亦有提醒自己拎到診紙, 同時提我下一次要自己講, 因為行出咗健康院先攞番, 就要收$160架~

見完姑娘就見醫生, 又等了差不多半個鐘~ 又係老公唔入得去, 所以下次佢話唔一齊來啦~ 醫生見面的時間不長, 唯一就係可以聽吓BB的心跳聲~ 今次係第一次正式聽到BB的心跳, 幾開心架~ 另外自己有主動問醫生攞Materna, 醫生話可以開俾我, 又可以省一點錢了~~

最後就是抽血, 一次過抽4支, 都擔心痛架, 因為都有人話健康院姑娘手勢唔一定好~ 幸好這次不算好痛, 但就比平時慢, 姑娘都抱怨我冇咩飲水, 令到啲血較稠, 就抽得慢了~ 下次抽血的話自己真係要飲定啲水先~

最後約埋下次覆診日期, 仲有去藥房拎Materna就走得~ 結果都用了幾乎一個上午~ 傳說中會有很多媽媽會的姨姨在健康院內, 不過今次見到2個咋, 而且禮物亦不多, 只有2條紗巾, 不過唔緊要啦~

下一次再去健康院係6個星期後了~~ 應該會自己去, 費事要老公又悶一個下午~~