我的生產記~

可能大家都睇過不少人的生產記錄, 但相信冇一個係相同, 每個人都有她的特別經歷, 自己也不例外~

自己同老公一直都希望BB可以39周才出世, 因為之前看報紙, 外國有研究話39周至40周出世的BB, 比所謂「足月」(37周) 的BB, 較少有學習困難的情況, 心肺功能也會再好一點, 所以應該將39周才當為「足月」云云……不過研究還研究, 世事真係唔一定會跟足自己的心意~


第一日放產假, 諗住冇咩特別事做, 於是在屋企睇吓雜誌、上網之類……不過早上大約10時開始, 個肚在痛, 好似M痛那種, 但每次都不規則, 有時10分鐘痛一次, 有時半小時才痛一次, 而且又冇見紅又冇穿水……上網找資料, 話這種可能係「假宮縮」, 即係BB未出世, 只係子宮想預習一下, 於是就有不規則的陣痛……於是就上床瞓吓, 盡量試吓放鬆自己啦……肚痛就好似少咗……

去到當晚, 同老公去平台行吓, 點知又有肚痛……返到屋企一換衫, 竟然發現見紅……於是即刻沖涼, 執好走佬袋, 落街, 因為找不到的士, 於是爸爸車我去醫院…

去到產房已經晚上十點幾 (醫院規定晚上9時後就直接去產房), 姑娘檢查之後, 話未生得, 不如入去產前病房待產, 於是轉回去產前病房瞓吓……姑娘裝了BB心跳機監察BB心跳……諗住瞓吓, 不過自己很緊張, 睡不到, 於是姑娘同醫生都發現BB心跳好快, 唔知係咪我影響到佢……因為測咗好耐都係心跳較快, 醫生話你有3個選擇, 一係催生, 如果催生不成就要開刀, 一係就咩都唔好做……醫生講到BB 心跳好似有問題, 既然都要生, 不如快快處理, 希望BB冇事, 於是我就揀催生……姑娘就叫我通知老公入醫院陪產…另外要在右手上刺入鹽水針, 即係隨時吊鹽水或注入藥物……右手刺痛, 但冇辦法……

揀了催生, 即係即刻入產房……又轉番入去產房, 個人覺得產房有部份姑娘有些不悅, 覺得做咩你唔瞓吓, 就唔駛凌晨來生阻住她們休息……不過唔理佢哋點諗, 而且呢個係醫生決定……醫生先用人手穿羊水, 即係覺得有水湧出來……又肚痛又被整痛, 很痛, 不過更痛的仍未到……

穿了水之後, 姑娘好似話已經進入產程, 於是印象中沒有落催生藥, 又或者落了自己唔知…不過總之就去到陣痛階段, 肚子愈來愈痛, 亦愈來愈快就有痛楚……但因為未生得, 唯一可做就係聞笑氣, 最初都有少少效用, 不過個肚愈來愈痛, 就根本一點用都冇了, 而且愈來愈有種「急大便」的感覺……依家諗番都覺得辛苦……

老公可以入來陪產, 代表子宮開到一定度數, 亦即係幾乎最痛的階段……真係痛到有點不由自主, 又喊又扭埋一邊, 吸笑氣都冇咩用……由於醫院晚上冇麻醉師, 所以係冇得揀無痛分娩, 不過自己其實冇諗過用, 因為要插針喺脊骨, 都覺得驚, 雖然聽講插針係唔痛的……總之就係痛, 又勁想「去廁所」, 要捱過真不容易……

終於, 可能自己不停叫痛, 姑娘話不如試生, 於是就開始用力, 不過最初就唔係好得, 之後開始明白, 就開始每次陣痛, 就閉氣及出盡力, 將BB推出來, 不用力的時候就要定住, 唔好俾BB縮番入去…要用力時真係出盡全身的力氣, 幾辛苦, 而且右手又插住針, 都怕影響用力……如是這不知幾多次, 可能大約10次吧, 突然姑娘話個頭終於出來了, 之後身體都出來了, 聽到BB「呀」大哭一聲, 知道自己終究成功了……幸好不用開刀, 不然就要再痛了……由10點幾到清晨5點幾, BB終於出世了~

見到BB終於出來真係好開心, 姑娘亦很快請我們拍照, 記下了這個難忘的一刻~

之後無論是排出胎盤, 定係縫補會陰傷口, 都不算好痛了, 總之見到BB順利出世, 自己已經很感恩了~

在產房休息了大約一小時有多, 就被轉去產後病房休息……但最初有12小時是不可以下床, 另外就係要6小時內去到小便, 不然就要插尿喉24小時, 幸好自己算做到了……

留在病房不是舒服的經歷, 除了忍受傷口痛, 而且開始試餵母乳, 幾乎每2小時就被「姐姐」叫醒一次餵BB, 幾乎冇覺好瞓, 而且12小時可以落床之後, 就要自己照顧BB, 例如自己換尿片、用包被包好BB等, 對新手媽媽都係新挑戰, 因為一令到BB大哭, 鄰床都被嘈醒, 自己也不好受…...而且姑娘同「姐姐」都好忙, 想她們好聲好氣都幾難, 而且找她們幫手, 有時都會被抱怨, 不過有部份姑娘或姐姐的態度是好的……不過無論如何, 比起生產時的痛, 這些都可以忍受的……可能住私家醫院會好過住公立醫院, 不過既然自己想順產不開刀, 都係住公立醫院了……幸好有老公及家人來探望及支持, 奶奶又整了魚湯及薑飯補身, 真係很謝謝他們~

現在已經出院回家, 努力學習照顧BB, 但每次諗番這段經歷, 總是百感交雜……無論如何, 真心覺得每位母親都好偉大~~~ 見到BB可愛的樣子, 什麼辛苦都是值得的~~