2016年1月15日

BB一個月~

雖然湊B生活真係好忙, 不過都盡量記低一些難忘事, 唔係第時可能會唔記得自己同BB做過什麼~




第一個月的BB:
由體重不夠標準, 終於追回了算是正常的範圍, 有3.8kg, 暫時是中細碼bb~

BB最初只會大喊來討食, 依家會有一些小動作, 例如放手或手指入口, 將頭轉來轉去找食物, 或者伸出舌頭, 又或者發出「啜啜」聲, 如果都冇得食先會大喊~ 有時看她的小動作都覺得幾有趣~

最初BB成日瞓, 依家有時幾個鐘都唔瞓, 眼仔碌碌~ 有時放在我們床上會動手動腳, 偶然仲有BB話, 依依呀呀, 又係好得意~ 而且學緊笑, 有時有意無意笑吓, 見到都開心, 希望她快點學識真笑啦~~

近來開始好似識認人, 起碼見到我, 老公, 奶奶, 工人姐姐都會細看, 又好似聽緊我們說話~ 對燈光、對新地方等都會好奇望來望去~

BB終於有自己的名字同出世紙, 小名就叫「TT」啦~

第一個月的我:
算係修了一點身材, 不過應該比之前肥了少少, 因為有些褲差點穿不下…

暫時除了帶BB去健康院, 仲有一次去商場幫BB買嘢, 都冇咩去街…唔係唔想去, 不過出去好似冇咩好做, 又掛住BB, 又驚帶病菌返屋企, 而且個人有時都係攰, 都係留多點在家…

仍是「窮媽」, 依家BB都係既食奶粉, 又食母乳, 每日食到5至7次母乳, 又食幾次奶粉……有試吓泵奶, 睇吓自己有幾多……最初泵到好少, 到依家一次兩邊計埋有2至3安士, 當自己有少少進步了……「全母乳」唯有當係一個希望/夢想啦……其實「最壞」情況都係食奶粉, 其實自己都係奶粉餵大, 所以就算轉食奶粉也不是一個大問題, 只係一個「選擇」而已, 其實冇話食母乳的BB一定冇病, 一定好聰明, 個個媽媽都想BB健康成長, 先想俾BB食母乳, 但如果盡力了都唔得都冇辦法的~ 唯有咁樣安慰自己啦~

另外當然就係冇覺好瞓的問題~ 因為想餵母乳, 於是盡量堅持半夜餵, 真係要每2個鐘就要食一次, 這個任務在夜晚當然是苦差, BB自己醒又好, 你叫醒佢都好, 一定無覺好瞓……要適應新的睡眠習慣又是不容易, 暫時不用返工仍可以忍受, 都好怕第時返工會更累……不過依家仲有一個月多些的產假, 慢慢再處理啦……


滿月時和親戚一齊吃蛋糕就當慶祝了~~

過了一個月, BB看來已經大了不少~~ 暫時不多頭髮, 所以似男仔~ 個個親友都話佢似爸爸, 不過我冇所謂, 總之健健康康, 開開心心, 快高長大就好了~

沒有留言:

張貼留言