2012年10月26日

近來的DIY~~

隔了一段時間冇寫blog添~~ 要快d補番先~~

月頭同朋友參加了團購整氣球班~ 整咗呢個小公主~~ 睇落好似好易, 其實都好多個步驟, 而且自己真係唔係好識得扭波, 又驚爆波, 好彩冇~~~ 見到其他人好快就整到, 自己有幾次都要miss幫手先搞得掂~~ 整完個樣都好可愛, 不過氣球擺唔得耐, 幾日就漏咗氣啦~~

有興趣可以看看它們的網站同FB, 有好多裝飾同佈置, 什麼場合都有架~~

囍點製作 (BalloonCake): http://www.ballooncake.com/



之後又參加了整macaron袋仔~~ 又係揀咗藍色~~ 真係好迷你, 但都係好多步驟, 聽少一陣都唔得, 好彩雖然多人一齊學, 但miss都好用心教授~~ 整咗幾個鐘先掂~~ 買多了一包材料, 遲d有時間再整多個玩吓~~

呢間workshop仲有好多班, 例如結婚證書套, ring pillow, scrapbooking, 餐巾拼貼, 羊毛氈, 布公仔, 手縫bb鞋, 親子班, 咩都有, 又有材料賣, 荃灣課室的環境好大好舒服, 有興趣可以參加, 中環都有班的~

Teapot Art & Craft Workshop: http://zh-hk.facebook.com/TeapotArtCraftWorkshop



唔知嚟緊又參加咩DIY班好呢?~~ 大家又有咩心水?~~

秋天小遊山頂~

好耐都冇時間周圍行, 於是揀咗去山頂, 扮吓遊客先~~



依家無論去任何景點都係超多人~ 去等纜車, 都排咗差不多1小時先搭到, 唯有影吓纜車站~~ 望落多年都冇變咁, 定係有自己唔知呢?~~



搭車想有位又係要同一眾遊客競爭, 記住坐3座位那邊, 無論上落都係, 就可以睇到海景~~~ 暫時纜車都係紅色, 唔知第時又會唔會換新車?~~



我們買了纜車套票, 除咗包纜車來回, 仲包一次上去凌霄閣的360觀景台~ 都係第一次上去, 其實都係睇維港景色, 叫做比山頂廣場同環山徑高d, 景色點睇都係好靚, 而這個觀景台要收$30才可以上去, 似乎就唔算好值得, 不過當試一次去睇吓~



其實都有好處, 收錢嘅地方少人d, 看風景都好d~~


另一邊可以看到薄扶林水塘同南區 (水塘好似一塊鏡~~), 不過當日陽光太耀眼, 影出來濛濛的~~~



凌霄閣頂樓有人, 就是360的位置~~


之後行了山頂廣場一陣, 去了食haagen dazs, 不知不覺太陽開始下山~~



決定要快d去今次嘅目的地~~ 就係山頂公園~~

山頂公園係喺柯士甸山道行上去, 行了約10分鐘會先去到柯士甸山公園~~ 係一個西式設計的公園, 都幾多人喺度玩、喺草地野餐、放狗等~~ 很舒服嘅地方~~ 仲見到呢種好得意嘅小花~~

再繼續行上去, 行多20分鐘~~ 一邊行一邊見到幾個小公園, 很多草地, 人不多, 如果唔係要趕上山, 真係好想停低影多啲相同享受一下~~



終於上到山頂公園了~~ 太陽差唔多冇哂, 見到如彩虹的環帶~~~



原來山頂公園就係呢個亭, d劇集好多時都見到d角色嚟呢度~~ 如果有車, 揸上嚟有停車場, 方便過行路, 難怪有一班外國人來附近的草地野餐玩樂~~



之後就要趕落山, 因為個天黑得好快, 行到半路已經著哂燈~~ 其實幾有情調~~





落到山真係黑哂啦~~ 都走去行環山徑睇夜景先~~~ 條路好黑呀~~


不過就係要夠黑先睇到香港的夜景~~ 世界新三大夜景之一, 就在這裡~~ (不過自己個相機係影到咁多, 實景無論幾時來看都更加美~~)



之後去埋"老襯亭", 同啲遊客排咗一個鐘先可以坐纜車落山...如果有得揀, 大家真係要考慮好唔好坐纜車上落, 不過呢個方法真係最有風味的...

最後剛好8:30去了鴻星食大閘蟹, 雖然有8折, 不過都唔平, 但真係好好味, 超多膏~~~




咁就完成咗做"遊客"的一日~~ 有老公陪一齊玩真係好開心~~~~

2012年10月8日

美食小記~

剛剛去了荃灣遊一轉~~ 食到好飽呀~~

先去了"古法烘焙"試了它們新出的叉燒雞蛋仔~ 這是個"快閃優惠", 2小時之外出示它們FB的"叉燒相", 就可以免費試食~



如果去過荃新天地, 一定見過呢間舖頭~~


呢份就係叉燒雞蛋仔~ 樣貌同普通雞蛋仔好似冇分別, 但味道真係好有趣~~ 當然有叉燒味, 入面原來仲有蔬菜做餡~~ 當時老闆都喺舖頭, 就解釋雞蛋仔入面的蘿蔔、洋蔥絲, 浸了叉燒汁一段時間, 之後再加入雞蛋仔入面~~~ 第一次食咸的雞蛋仔真係好特別, 而且新鮮即製熱烘烘, 如果第時真係推出, 真係推介大家買來一試~~

呢間店仲有杏仁批、老婆餅、鳳梨酥等都很不錯~~ 有機會真想再食~~

為免好似"賣廣告", 介紹埋另一間老字號, 就是民豐粉麵行~~ 食完雞蛋仔就去咗試~~



呢個韮菜餅即製, 又熱又脆, 真係非常好味~ 入面除了韮菜, 仲有豬肉, 餅皮薄而餡多, 難怪很多人買~~



仲買咗糯米糍~~~ 相中入面係花生味, 比起平時買的大個好多, 而且皮又係超薄, 餡料超多, 食嘅時候幾乎飛到周圍都係~~ 甜得來不是"死甜", 有花生香同咬感~~ 又一推介~~ 芝麻味都係好好食~~~

食埋呢d小食, 幾乎唔駛食飯~~ 不過睇戲之前都同老公去了食碗麵先~~~

看了"閃亮人生"~~ 雖然是外語片要靠睇字幕, 不過都好好睇~~ 是真人真事改篇, 片末可以見到2個真人, 當然樣貌同演員好唔同~~ 兩位主角的友誼令人感動, 2個演員的演技真摰, 而且好多笑料 (例如黑色、黃色、桃色等等~~), 很有人情味的一套戲, 同"桃姐"都係主僕關係, 但故事同感覺都係好不一樣~~ 又係好值得推介去睇~~~

咁又一日開心假期了~~