2015年1月13日

南丫島一天遊 (上): 索罟灣、東澳、深灣、菱角山~

2015新開始, 趁住有4日假期, 1月2日就來個"新年行大運", 決定去南丫島一天遊~

南丫島其中一個熱門路線係由榕樹灣行去索罟灣, 或者反方向, 不過自己竟然係未行過呢條路線, 反而上年第一次在南丫島行山是去了榕樹灣那邊的北角路線 (blog)~ 所以今次當然想行吓~~

不過其實索罟灣仲有一條易行的路線, 就是由索罟灣去東澳, 或者由索罟灣去菱角山, 再繞一個圈去模達灣, 再返回索罟灣~~ 今次我們就先行了這條路線的一半, 才再去榕樹灣~~ 慢慢看下去就明白 ^^~~

又俾大家看看幾張行程的相片先~~


山地塘的涼亭~~ 可以遠望東澳和石排灣的景色~~


每年都有海龜來產卵的深灣~~


仲有在菱角山上看到的索罟灣~~~


又由頭講起先~~~


去索罟灣的船不多, 平均1小時才有1班, 所以當天要計準時間去碼頭~~ 估唔到10點一去到, 已經成個碼頭都係人, 似乎好多人都今日請假, 想入離島行吓~~ 架船係大船, 都成7、8成滿~~


坐了40分鐘就來到索罟灣, 仲快過去長洲, 而且人也少一點~~


行去榕樹灣和東澳的路一開始都係相同, 就是經過索罟灣的天后廟~~ 廟就不影了, 影了附近的淺灘~~~


天后廟後面有條上山的路, 有這個牌, 寫住南丫島家樂徑去東澳, 就對了~~


沿路都是石屎路, 行都OK, 不過好多樓梯級~~ 另外就係好多祖墳, 相信都是附近的村民起的~


行了約30-40分鐘, 就會去到一個十字路口, 如果當正面 (向前)係去東澳, 左手邊的路係上菱角山, 右手邊就是去山地塘~


向山地塘的方向有個亭, 可以上去望望周圍的風景, 都幾靚架~~ 其實山地塘都係島上一條行山路線, 但過了亭之後就沒有石屎路, 只有山路, 有行山經驗的人才適合行~~ 老公就行過一次, 但我呢種行山新手都係覺得難行, 於是又返落去十字路口~~ 決定先去東澳看看~~


去東澳係落山, 沿途有一兩個位置, 可以看到海岸線~~ 風景不錯呀~~~


又行了30分鐘, 去到東澳~~ 它的對出就是石排灣~~ 果然周圍有好多石頭~~


不過周圍都有好多垃圾......可能這裡比較偏僻, 好難有人來清潔, 不過我們減少垃圾當然更加重要~~


原本大好的美景, 但成個沙灘都有垃圾, 令人無奈......

之後, 我就好想去傳說中香港的海龜產卵地 - 深灣~~ 在電子地圖同十字路口的地圖上, 看到有條路由東澳去深灣, 但行了一輪找不到, 結果問了一位婆婆, 原來在這裡~~


東澳村中有個牌指住去索罟灣~


它的隔離有條石仔路, 沿住它行20分鐘就到~~


一去到就見到警告牌~~ 因為深灣每年都有海龜來產卵, 所以每年6月1日至10月31日, 這裡是嚴禁進入......原來這裡每年夏天同初秋是保護區, 不可進入架~


有間漁農處的小屋~ 應該是俾工作人員同研究人員住的~~


這個海灘好唔同, 一點垃圾都沒有, 水清沙幼~~~ 竟然仲有2個外國人在這裡著泳衣曬太陽~~


難怪海龜會來, 因為這裡真係幾有隱世的感覺~~


附近有些石頭, 我們又行上去一陣~~


回頭又望吓個沙灘~~

好想留多一陣, 不過行程緊湊, 因為下一個目標就是菱角山~~

旅遊地圖教的路線是繞圈, 不過我們要去榕樹灣, 所以決定不繞圈行去模達灣, 上去菱角山望一望~~

先由東澳返轉頭上山, 已經累了一半, 於是一行到十字路口休息一下先...


之後就拾級而上, 慢慢行上去~ 冬天比較大風, 行行吓都覺得不太穩陣, 要小心一點...

不過從山上望下來感覺不錯呀~~ 上圖是在山地塘亭上影的, 有條石徑的就是菱角山~ 它的山頂有發射站, 所以行到上山頂係不宜久留的~


雖然已經全部係石屎路, 不過行吓行吓, 行了幾百級樓梯都唔止, 愈來愈攰, 結果未去到發射站, 就決定影幾張相, 然後落山去番十字路口~

其實這個菱角山仲有另一樣出名, 就是周圍的大石同怪石~~ 夠膽可以行上甚至爬上啲石影相, 不過真係要小心安全呢~


這裡都接近山頂位置, 可以遠遠看到頭先去過的石排灣~~


仲可以看到東澳同深灣架~~ 如果今日天氣再好一點, 天色藍一些, 風景一定更好~~


老公再行多幾步上去, 有個位置就可以遠眺索罟灣, 景色挺美~~~ 如果有腳骨力又去過南丫島幾次的朋友, 菱角山路線同東澳路線都值得一行呀~~

之後我們落番去十字路口, 再落番去索罟灣, 又用多大半小時, 幸好落完山都係下午2點幾, 一定夠時間去榕樹灣, 於是又進發了~~ 留待下回分解~~

有關菱角山、東澳和深灣:

http://www.hike.hk/load.jsp?route=lammab&page=1

http://www.oasistrek.com/lamma.php

http://www.discoverhongkong.com/tc/see-do/great-outdoors/hikes/ling-kok-shan-hiking-trail.jsp

http://hk.apple.nextmedia.com/supplement/travel/art/20040912/4301345

http://edwinor.blogspot.hk/2011/08/blog-post_16.html

http://szetogary.blogspot.hk/2008/07/blog-post_06.html

https://www.afcd.gov.hk/tc_chi/conservation/con_fau/con_fau_sea/con_fau_sea_con/con_fau_sea_con_the.html


沒有留言:

張貼留言