我們愛唱K@Neway CEO~

其實我同老公都幾鍾意唱K, 雖然不算唱得好好聽 (但我覺得老公唱得好正架~~), 不過我哋隔幾個月或者大時大節, 都想去開開心心玩一餐~~ 這次就去了荃灣的Neway CEO~ 其實之前好多間都去過, 例如Megabox、旺角、元朗、尖沙咀等, 唔知呢間又掂唔掂?~~

這晚是星期六, 一個人已經要2百幾蚊, 不過今次當慶祝3周年, 又預先慶祝聖誕節, 貴少少唔緊要啦~~

先吃小食同果盤~~ 個爆谷比想像中好食, 唔錯~~ 水果都冇變味, OK架~~

周年晚飯@中國芳~

時間如流水, 已經是三周年結婚紀念~~ 上年就去了新加坡旅行當慶祝, 近來為了儲錢, 決定簡單慶祝一下就是了~ 老公想食中式, 於是選了這裡~ 因為3年前, 我們差點就在這裡擺酒, 點知最後都係選了另一間~~

有段時間冇嚟過, 不過裝潢冇咩變化~ 雖然係平日, 不過都幾乎坐滿, 因為臨近"做節"呀~~

先吃了前菜, 有黑木耳、青瓜、豆腐、毛豆~~ 因為"中國芳"係食京式菜, 所以前菜同平時的酒家都有分別~~ 酸酸哋幾開胃, 好快就食哂~~

之後來了蝦仁煎豆腐 (佢有個正式名字, 不過忘記了...), 味道都係酸酸甜甜, 豆腐煎得少少脆, 入面好滑, 幾有水準~ 可惜蝦仁數量不多, 雖然都好食, 不過同餐牌張相差好遠, 餐牌的相是一舊豆腐配一舊蝦, 依家一上碟都已經蝦同豆腐分開哂......下次都係唔好信呢啲"官方相"...

漫遊白腊灣、糧船灣與西貢海岸~

上次跟團購去完萬宜水庫、糧船灣和甕缸群島之後, 又有機會參加"中銀香港綠色社區計劃"的"香港地質海岸生態考察行"~ 因為我們都未去過白腊灣, 於是報名時就揀了去糧船灣、萬宜水庫和白腊灣的路線, 即係又有機會遊船河同看靚景~~

這裡就是白腊灣~ 一行到呢個位, 大家都停低影多幾張相~~原來香港真係好多風景美麗的沙灘, 這個沙灘絕對比得上大浪西灣等有名的沙灘呀~~

晚飯@牛角~

有段時間冇食過燒烤, 我同老公都好想食, 結果有日夜晚去了"牛角日本燒肉專門店"~~ 平日都有不少人等位, 我們都等了半小時有多先有位~

原本信用卡有個優惠餐, 見到鄰枱幾枱都係叫呢個, 不過老公驚食得太飽, 於是散點~~ 先來了一個海鮮煎餅~~ 不過味道普通, 海鮮也不算多, 而且唔算飽肚~~

我們點了3款肉, 包括牛助骨肉、牛肉粒, 仲有豬肉片~~ 有得自己落手整, 睇住啲肉由生變熟, 無論整幾多次都係覺得好玩~~ 唔係因為怕熱氣, 真係想食多啲~~

話咁快就燒了不少~~ 同時仲有食涼伴墨魚嘴~~ 味道都ok, 不過好細碟, 好快食哂, 都唔係幾飽~~

唯有又叫多個雜菜石頭鍋飯~~ 不算有驚喜, 但味道也不差, 起碼有飯食, 開始飽番啲~~

食埋啲燒肉就飽哂~~  埋單要3百多元, 不算好抵, 不過偶爾一次吃點燒烤, 總是覺得開開心心~~

牛角有好多分店, 而且店主希望推廣慈善, 除了平時落單點菜, 仲可以點買餐券俾有需要的人士, 有興趣的話, 幫襯食嘢時可以順便做善事架~~

http://www.openrice.com/restaurant/sr2.htm?shopid=143780&tc=sr1

午餐@八戶屋~

自從領匯接管了安定/友愛商場之後, 就開始了需時3年的裝修, 近來看到大部份商場範圍的外形同內部裝潢都來了個大變身, 好似一個全新商場, 亦多了很多新食店, 八戶屋就係其中一間~ 由於暫時是商場唯一的一間日式食店, 所以好多時行過都好多人等位~ 今次因為12點就行過, 於是決定一試啦~~ 唔駛等位就入得~

每人一杯柑橘蜜飲吓先~~ 跟餐飲品來的~~

晚飯@吉野家~

天氣開始冷, 又係打邊爐的好時節~~ 自己食過不同食店的打邊爐, 就係偏偏冇食過吉野家的一人火鍋~ 老公又話好耐冇食過, 當然要去食吓~~

6點幾去到已經人山人海, 幸好剛巧有2個位, 即刻坐低~~ 唔係就要同人搭枱先有位, 想唔搭枱, 而個個都食緊火鍋, 可能要等半小時以上呀~

我同老公都是小食之人, 於是叫了一份帆立貝火鍋, 之後再加錢去加餸~~ 而且我們那張是2人枱, 擺2個爐真係好迫~

打開個煲, 如果以一人份量來說都幾足料~ 魷魚看來大大隻, 反而帆立貝不算大粒, 一啖都食得哂~ 仲有一份牛肉、日式魚丸、豆腐、菜、冬粉等, 如果一個人食都應該夠飽, 唔駛加餸~ 不過我們2人一鍋, 所以都加了2次, 再要牛肉、烏冬、餃子、菜同墨魚餅~ 計埋百多元, 都比去酒樓或火鍋店食抵好多, 難怪一到冬天就好多人食啦~~ 而且這個火鍋的蕃茄湯底幾好味, 又可以自由追加, 唔錯~~

另外, 食夠70蚊可以換個月曆, 入面有優惠劵, 都抵~ 不過唔知此文出街之時換哂未~

http://www.yoshinoya-hk.com/

http://www.openrice.com/zh/hongkong/restaurant/%E5%B1%AF%E9%96%80-%E5%90%89%E9%87%8E%E5%AE%B6/10501?tc=sr1

團購晚飯@德里.西廚, 看"星際啟示錄"~

之前9月的時候買了$98的2人餐團購優惠, 一直拖到11月才用~ 最初都幾乎book唔到位, 不過食店懂得變通, 話唔駛訂位, 直接去食就得, 於是找了個星期二晚去食, 希望平日少啲人~~

幸好去到即刻有位, 見到幾乎個個都係食團購餐~~ 好快點了菜, 又好快有得食~~

先飲了餐湯同食沙律~~ 沙律味道不錯, 羅宋湯都幾好飲, 反而忌廉湯好似溝了水, 好淡, 冇咩忌廉味, 唔係好得......湯係可以添飲, 於是老公都再添多一次羅宋湯~~

之後就來了雜扒~~ 其實餐牌上除了雜扒, 仲可以揀海鮮飯或意粉, 不過我們都覺得雜扒多點選擇, 而且比起飯似乎冇咁飽, 於是揀咗~~ 味道普通啦, 起碼各種肉類都有自己的味道, 薯條都幾脆, 結果食吓食吓都飽飽哋~~

祖母壽宴@紅磡景逸軒~

上年在翠園替祖母慶祝大壽, 話咁快又一年, 這次就去試紅磡都會海逸酒店內的景逸軒~ 本來我姑姐有另外的心水, 點知婚宴時期, 間間酒家都俾人包場, 唔做一圍飯的生意, 幸好這裡雖然都有兩個團體擺婚宴, 不過仍做散客, 於是就訂了這裡~ 另外自己都係第一次嚟, 當試新嘢~~

有得坐房~ 雖然面積只係剛剛好一圍枱, 不過總好過坐出面, 起碼私隱度高啲, 而且都坐得舒服, 又有電視睇, 仲有一位侍應專門照顧我們, 不錯~~

最先上枱是心心燈乳豬, 夠cutie~~ 皮脆肉嫩, 幾好食~~

coupon晚飯+甜品@東京築地拉麵、許留山~

自己都幾鍾意睇免費報紙, 不但有不少有用新聞同資料, 不時仲有很多優惠劵~~ 這晚就一次過去了兩間食店去吃晚飯同甜品~~

先去了"東京築地拉麵"~ 店子前身好似係甜品店, 再之前又係其他舖頭, 總之易手幾次~~ 今次原來開了一間拉麵店~ 手持的優惠劵卻不是吃拉麵, 而是30蚊一碗牛肉飯~ 我們就決定一個牛肉飯+一個拉麵, 一人食一半~~

先來的是叉燒拉麵~~ 個人覺得豬骨湯底唔錯, 鹹度剛剛好, 不太油膩~ 叉燒都易咬, 味道ok~ 溏心蛋都可以, 不過凍凍哋, 唔知係咪雪藏貨色.....拉麵都煮得幾好, 少少彈牙, 不太"淋"~ 原來這間的拉麵質素都不錯, 五十幾蚊物有所值~~

晚飯@平昌韓國餐廳~

這篇真係新鮮熱辣的食評, 因為呢間食店新開張, 連Openrice都未有介紹, 優惠暫時至11月30日, 如果睇完呢篇食評, 大家有興趣一試的就要快一點了~~

昨天去了尖沙咀同佐郭交界辦點事, 之後和老公來來回回在看究竟吃什麼好......去到莊士倫敦廣場樓下, 看了那些餐廳單張, 見到呢間韓國餐廳好似價錢合理, 於是就上了5樓~

當時客人不多, 可能因為是新店開張~ 自己想食韓燒, 不過老公怕熱氣, 結果叫了3個菜式, 就坐喺度等~ 其他客大多都是吃韓燒的~

先來了6小碟前菜~~ 之前去其他韓式餐廳, 前菜都係普通, 點知呢幾碟雖然份量唔算好多, 但部份味道唔錯~~ 最前那個是蕃薯蓉, 插了一塊蓮藕片和有些杏片, 整得很好食~~ 最後的那碟魚絲都唔錯 (不過唔係好影到)~ 最後排仲有一份芝麻醬蓮藕片, 蓮藕片幾爽, 不過如果芝麻味濃一點就更好食~~

參加芝梅海濱地貌遊~

之前我們都有興趣參加"新創建香港地貌行", 不過幾年來唔係時間唔夾、對路線冇興趣, 就係中唔到簽, 或者時間唔啱, 今年終於成功報名, 有得去行山~~ 這次又是3人行, 搵埋奶奶一齊玩~~

沿途看到的海景很美哩~~ 下文再分享多些相片~~

一齊行去碼頭先~~ 見到就嚟起好的香港摩天輪~ 雖然臨海的風景一定唔錯, 不過報紙話成人1張票都要100蚊, 真係要諗吓坐唔坐~~

去到5號碼頭, 登記之後就拎免費船票~~ 張票好大張, 因為有地圖, 背面就有船期~ 這次活動係包來回船費, 喺芝麻灣落船, 行去梅窩, 之後可以免費坐船回中環, 或者坐一程橫水渡去其他離島 (例如長洲), 不過之後坐船返中環就要自費了~~

上船之後, 冇咩做, 趁住未暈船浪, 影吓維港先~~ 這日有難得的好天氣~

清楚看到昂船洲大橋~~ 原本都想看多點風景, 不過可能早起身, 人有點累, 要小睡片刻......

起身的時候, 已經到了芝麻灣~~ 海天一色~~~

花生糖製作班~

自己一向都好鍾意食花生糖, 無論係硬的、軟的都覺得好食~ 當屋企人個個都怕甜/怕硬/怕「痴牙」的時候, 自己可以一次過食十幾粒都得~ 所以見到有自製花生糖製作班, 就去參加啦~~

這份是黑白芝麻花生糖~~ 整完之後好香呀~~ 味道都不錯......不過睇哂就知係有啲不足嘅~

晚飯@黑福多拉麵~

呢間拉麵店開業的時候好多人架, 當時都幫襯過一次, 覺得拉麵都幾好味, 不過不算抵食, 於是有段時間冇去過~~

今次再來, 可能早了一點, 所以不多人, 2個都可以坐卡位~~

記得第一次來食是試"黑湯", 即係加入墨魚汁的湯底, 今次選了吃套餐, 拉麵就只有"白湯"或"紅湯" (即是辣湯底)~ 自己怕辣, 要"原味"~ 老公想試吓紅湯, 於是要了少辣~~

樣子都不錯, 傳統拉麵式~~ 叉燒半肥瘦, 軟軟哋幾好味~ 湯底不太鹹, 有豬骨味, 雖不算驚喜, 至少保持了水準~ 成碗食哂~~

老公那碗拉麵咩同自己的一樣, 除了湯底有少少辣~ 老公都覺得合格~ 套餐每人有一罐汽水, 我們選了日式的橙汁及提子汽水, ok~ 另外每人有份小食, 自己選了餃子, 得2件, 唔抵......老公選了燒牛脷, 估唔到幾好味, 總之我都要牛脷啦~~ 因為一份晚餐都80多元, 連加一就每人90多元, 如果以價錢來說, 不算最抵食...

走的時候, 終於多了人等位, 應該暫時唔會執掛~~

原來它在荃灣都有分店, 另外它是Pokka Cafe旗下的食店, 有興趣都可以一試~~

http://www.openrice.com/restaurant/sr2.htm?shopid=123548&tc=sr1

http://www.pokkacafe.com/chi/news/index.html

hea遊碼頭海邊~~

香港每個地區都有不少特色的景點, 而屯門其中一個值得閒逛的地方, 就是屯門碼頭的海傍~~

在舊手機清理相片時, 找到這些在8月拍的相片~~ 當時剛巧經過碼頭, 見到風景不錯, 而且天氣晴朗, 決定又行逛一下~~ 其實之前已經嚟過不少次~~

抹茶小蛋糕~

上次那包抹茶粉有一定份量, 用了一次來整凍餅, 還有不少, 於是今次用了上次街坊蛋糕班的食譜, 又參考了其他blogger的食譜, 試整了抹茶小蛋糕~~

影出來好似好大個, 其實是迷你蛋糕來的~~~

午飯@baby cafe

呢間baby cafe其實已經開了一段時間, 又係要趁機會才可以來幫襯~~

剛好有2個位, 即刻坐低, 就去收銀處落單, 之後拎號碼回座位等, 就有侍應送上食物~~

先來的是跟餐嘅凍荔枝茶~~ 甜甜哋, 有淡淡的荔枝味, 雖然應該係人造果汁, 不過都幾好喝~~ 入面還有一些薄荷葉碎作點綴~~

抹茶朱古力芝士凍餅~

很久沒整過甜品啦~~ 有日行過City'super, 買了一包富澤商店的抹茶粉, 就是想自己的起心肝整一次抹茶蛋糕~~

成品有點似慶祝萬聖節的蛋糕, 始料不及 ^^~ 不過一早已經食哂落肚了~~

自助餐@Cafe Kool~

這間自助餐是親友的心水, 次次有優惠或節日, 除了去中式酒家, 就會來這裡開餐~~ 今次又一大班人來食自助午餐~~

我的"食力"麻麻, 雖然很喜歡自助餐的形式, 鍾意食咩就食咩, 不過為了平衡食量及價錢, 唯有吃些貴d又冇咁飽的食物~~

頭盤當然是蟹腳及小龍蝦鉗~~ 個人覺得這裡的蟹腳幾好味, 每次來都保持水準, 而且長攞長有, 供應充足~ 自己食完呢碟, 又拎了老公的幾隻來食, 不錯~~ 其實仲有青口、螺等等, 不過自己不不太喜歡, 都係蟹好味d~~

晚飯@水晶晶泰國餐廳~

有日同奶奶3人行, 去荃灣食飯, 唔係好諗到食咩, 見到呢間唔駛等位就試吓~ 附近的金坊一早好多人等位, 係咪有位的泰式餐廳就差啲呢? 試過先知~

3個人叫了4樣食物~~ 先來的是泰式粉絲雜菜煲, 以及泰式牛仔骨小食~ 牛仔骨本案味道不太差, 無論點唔點辣汁幾惹味, 不過薄片得來仍然比較硬, 肉質普通......

至於雜菜煲似乎同中式差別不大, 不覺得很泰式, 但味道是合格的~

抹茶零食(2)~

之前寫了一些綠茶零食, 當然仍然意猶未盡, 一見到或有興趣都會買來試食~~

黃絲帶帶來的反思...

(以下純粹個人意見, 不喜歡就不看好了...)

香港的美麗, 就是它有自由, 讓大家用不同方式, 表達任何意見, 而又互相尊重.

可是, 這幾天的亂局, 卻令人痛心......原本學生及"佔中"人士發起的行動, 本人雖然精神上支持, 但罷工罷課、佔領馬路卻是違法手段, 影響了社會運作, 而且警察等"工作人員"都係人, 為了大家示威, 好多日都要當值, 不能回家休息或與子女團聚, 係辛苦嘅......但呢個政府, 唔行呢步, 佢真係"睬你都傻".......看到身邊部份同事、朋友都有參與, 自己都曾經想過, 但最後還是沒有......其實內心真係好矛盾......

之後, 開始有"反佔中"人士借名趕走示威人士, 不惜使用武力, 警察又被指袖手旁觀......如果用暴力解決問題, 又同用催淚彈有咩分別?......就算想解決"佔中"問題, 都唔係以暴易暴啦?......如果警察有咁做, 真係令人失望......那些什麼"反佔中"人士更加不值一提......

這件事, 卻令自己回想起上屆立法會選舉, 建制派從泛民手上搶了不少議席, 結果令到功能組別及民選組別, 都係建制派為主, 泛民失去了在議會用投票制衡政府這個方法......當時, 自己曾有朋友在FB說, 建制派可以動員咁多人投票, 就算有利益輸送、動員能力都好, 都要諗吓, 點解咁多人都要投俾建制派......其實泛民係咪要反思, 點解用投票呢個"合法"方式贏唔到? 係咪當時大家唔夠團結, 先唔能夠送多啲泛民議員入局, 而令到有今日的局面?......當然, 政府的"議會遊戲規則"本身就係唔公平, 但如果呢個已經係一個較和平理性的方式去表達訴求, 為何當初泛民同支持泛民的人士不好好團結......結果亂局已成, 但下屆立法會選舉仲有2年幾先舉行......當時自己就已經為選舉結果痛心...而家更加無奈......

定係其實......主流意見根本已經開始傾向建制派?....所以上屆立會選舉, 才有咁多人投俾佢哋?...但係唔好忘記, 次次立法會選舉投票率都唔過6成.....究竟應該用投票表達訴求的人去哂邊?......如果當初多啲人投票支持泛民, 係咪唔會導致今日的局面?......

但這一切早已過去, 追不回來......依家可以點?......心裡唯有希望參與行動的大家小心安全, 平安...祈求亂局早日平息......但更重要係, 大家更加要保持冷靜, 耐心反思, 想清楚......

晚飯@花園餐廳~

有日放工去旺角拎團購買的物品, 之後又要諗吓食什麼晚餐......

老公抬頭見到個霓虹燈牌, 突然就話"食呢間啦!" 再望真啲, 原來係薄有名氣的老牌餐廳~ 既然自己又係"大鄉里", 未食過, 當然要試吓它們的招牌鐵板餐~

以為花園餐廳的英文名係Garden Restaurant之類, 點知係"甜心花園餐廳" (Sweetheart Garden), 再看清楚餐牌, 原來它是屬於"心心集團", 而且除了旺角, 觀塘、銅鑼灣、尖沙咀都有分店, 真係唔去唔知~ 我初初以為只有一間咋~~

我們去的那間分店有2層高, 去到的時候人不太多, 可以坐卡位, 之後已經好快滿哂, 等位的人沿樓梯排到出門口, 估唔到幾多人喎~

先來一個餐湯同麵包~~ 羅宋湯味道ok, 麵包都ok, 最好就是牛油, 暖暖的, 一搽就得, 坊間好多餐廳的牛油都係雪硬哂, 呢啲小細節值得加分~

晚飯@北海道牧場餐廳、話劇"杜老誌"~

喜歡看話劇的我, 總是希望多看不同的劇種, 不過票價不便宜, 不能個個月都睇......但呢次知道劉嘉玲、梁家輝、謝君豪這3位影帝影后, 聯手參演"杜老誌", 當然好想去看~

這些巨星參與的話劇從來都好受歡迎, 7月的票一早賣哂, 難得9月再加場, 即刻上網睇, 好彩買到最平的票, 雖然又要坐山頂位, 又要係平日, 不過買到都幾開心~ 最難得老公不怕悶陪我睇~

放工即刻趕去灣仔, 看劇前當然要"醫肚", 行行吓見到呢間, 不如試吓~~ 就係"北海道牧場餐廳"~ 早年它剛剛開張都好有興趣, 不過拖到呢日先來~

幾得意的餐牌~ HDF就是它的英文縮寫~ 好似賣牛奶咁~ 的確它的賣點就係咩都可以加3.6北海道牛奶~~

老公就飲3.6牛奶, 我就飲特色凍阿華田, 即係加多啲阿華田粉的凍華田~~ 我就當然鍾意啦, 因為細個都係會直接食阿華田或者美祿粉架~~ 不過食完粉再飲, 覺得杯華田淡味了一點~ 至於老公那杯就係牛奶味, 冇咩特別 :P  兩杯都係跟餐加$5, 我就鍾意華田多D~~

街坊蛋糕小食班 (下)

終於上最後一堂了~~ 這次就整鮮果撻及蘋果批~~~ 不過今次鮮果撻定係蘋果批的份量都係每人得3個, 似乎少了一點...

又係忙到焗完個撻皮才可以影一張相~~ 這個迷你一點的就是鮮果撻的撻皮底~~

晚餐@抹茶館~

這間抹茶食品專門店已經開了一段時間, 其實好想試, 不過總是沒有藉口~ 近期在Openrice見到他人提到, 它有個新的套餐, $69一份, 似乎幾抵, 於是就去試吓~

去到約7點, 都唔駛等位直入, 可能平日少d人啦~~

就係呢個套餐~ 一份拉麵/烏冬/飯, 加一杯抹茶飲品 (凍/熱都得), 再加一份甜品, $69 (另加一), 價錢ok噃~

先來的是抹茶飲品~ 自己要了一杯凍朱古力抹茶牛奶~ 其實所謂朱古力就是忌廉上的朱古力醬~ 不過雖然朱古力味不多, 但抹茶牛奶本身幾好飲, 不太甜又不太苦, 有淡淡的抹茶味, 不錯~ 如果散點要廿幾蚊架~

水晶滴膠DIY~

很久沒有玩DIY啦~~ 其實屋企買落了一堆DIY的材料, 不過就擺咗喺度都未玩添~~ 今次就整吓呢個啦~~

這個水晶滴膠材料包是之前去手工展買的~~ 店名是dot dot life zakka, 不過近期都冇見到它有更新, 唔知係咪仲有營業呢?

材料包入面有哂材料及說明書~~ 樽仔入面是A膠及B膠, 用3:1的比例來攬拌, 就可以整到水晶膠~ 另外就有一些圖案、小吊嘴和裝飾珠仔等, 可以放在銅托上~~

晚飯@楓林小館

和奶奶、老公家姐、姐夫、5人一同到大圍辦點事, 之後大家一致贊成出街食~ 家姐就揀了大圍有名的楓林小館~ 唔知這間老牌食店係咪真係咁好食?~~

大家本來想叫一客乳鴿, 因為聽說是這裡的招牌菜之一, 不過奶奶一看餐牌, 要95蚊一隻, 平時去酒樓都係四、五十蚊一隻, 貴一倍, 就話唔食......當然要尊重長輩意見...其他食物價錢也不算平, 於是揀了幾個家常小菜~

先來的是蝦子菜薳, 即係蝦子灑落菜心上面~~ 嗅起來有蝦子味, 不過食的時候, 俾菜味同醬汁味蓋過, 蝦子味不太突出, 但菜心都煮得幾好食~ 不過加了一點蝦子, 成碟菜要70多元, 都幾貴...

街坊蛋糕小食班 (中)

第一、二堂主要係整甜品, 第三堂就有朱古力合桃小蛋糕同 洋蔥煙肉芝士批 (鹹批)~~

先整了鹹批的油皮, 放入雪櫃~~ 途中就整朱古力小蛋糕~~ 原本應該有合桃, 阿sir又話唔記得買, 結果又只有朱古力味......在入爐前影張相先~~

剛出爐不久的樣子, 同未焗之前真係幾有分別~~ 我有6個呀, 同學仔好人, 讓了1個俾我~~

晚飯@和民、甜品@Starbucks~

好耐冇食過和民啦~~ V-City開了一段時間, 剛巧之前在報紙上有coupon, 食滿$150減$30, 就去食一次啦~~

一去到, 可以即入, 唔駛等位, 又可以坐卡位, 之後就已經排長龍~~

點了一個日式魷魚筒飯~~ 味道不算差, 但醬汁味道較淡, 魷魚本身冇咩味, 而且入面的飯都係冇咩味......加點沙律醬好少少, 不過就唔覺得自己食緊魷魚...老公話上次在"薩莉亞"食的燒魷魚仲好食...

晚餐@Cafe Heato (海圖)

一開始是在FB看另一個追開的專頁, 知道有這間cafe, 驚訝屋企附近這個冇咩人留意的小社區, 終於開了一間特色cafe, 點都想食一次~~

第一次係中午去搵位, 點知爆場, 冇空位, cafe又得一個人 (我估係老板), 冇人派飛或什麼排隊等位...唔, 於是決定同一日夜晚再來, 估唔到人少好多...幾乎包哂場~~

不過店子生意不錯, 好多食物都賣哂, 於是就叫了仲有的all day breakfast, 還有雞肉翠香汁意粉~~

食物未到, 就影吓周圍, 另一枱的2個女仔都喺度不停影影影, 我們都影了不少~~ 裝潢是近來熱門的旅行、簡約style~ 周圍掛滿不少特別的裝飾和明信片, 有點似"牧羊少年．咖啡．茶"或其他特色cafe~

吉卜力工作室展覽、Cloud Candy、晚餐@明珠閣

好雜碎的一篇, 又有展覽, 又有食物 ^^~~

其實一知道有吉卜力工作室的展覽, 已經好想快點抽時間去睇, 不過又怕多人, 諗住8月幾乎係展覽尾聲, 加埋揀平日去睇, 應該少啲人, 事實就係去到都要排半小時先有得入~~

排隊的時候做咩? 除了撥扇, 就是在吃這盒Cloud Candy, 是近來有不少宣傳的手工牛奶糖, 標榜香港人手製作, 天然材料, 於是趁一田有佢同其他手工果占的展銷會, 於是匆匆買了一盒, 48蚊不算平, 不過好想試吓~~ 買了原味~

街坊蛋糕小食班 (上)~

趁住有時間又可以請假, 報了一個附近社區中心舉辦的蛋糕+甜點+小食班~~ 每堂可以做2款不同的蛋糕/甜點/小食, 而且價錢不太貴, 決定一試~~

第一堂, 知道了上堂的情況, 又聽到其他同學同導師的談話, 就知有少少"中伏"......工具要一齊分嚟用都預咗, 但這次所有人要共用一個電子磅, 因為另外2個都壞咗, 唯有逐個人排隊, 由其中一個同學幫手量材料; 打蛋機得3個, 碗碟廚具都要自己攞、自己洗......比起去工x會仲辛苦, 起碼工x會工具都多dd, 仲有一個助手幫手洗碗...

另外佢哋話社區中心不時超收學生, 之前試過同時有十幾二十個人一齊整麵包, 好明顯工具唔夠分, 又唔夠時間完成製品, 當然好多人投訴啦~~

幸好今次計埋得8個人報名, 而且焗爐同雪櫃都夠位, 2個人一齊整, share啲用具都唔係等好耐.....

至於導師, 是退休的廚師, 都算有耐心教學, 不過由於他同他女兒本身都另有公司教人整蛋糕, 所以社區中心的工作都係"玩票", 以及借機宣傳一下他們的公司, 所以有時材料唔係買得好足夠, 睇埋落去就知~~

第一堂的其中一個成品是藍莓蛋糕~~ 製成時覺得有點似"莎莉蛋糕", 不過唔知係咪粉漿唔夠, 定係我們打發得有點過時, 不算發得好起, 另外藍莓果醬要大家一齊分, 可能份量不太夠, 食完覺得冇咩藍莓味~ 不過都食到嘅~~