2015年12月12日

我的生產記~

可能大家都睇過不少人的生產記錄, 但相信冇一個係相同, 每個人都有她的特別經歷, 自己也不例外~

自己同老公一直都希望BB可以39周才出世, 因為之前看報紙, 外國有研究話39周至40周出世的BB, 比所謂「足月」(37周) 的BB, 較少有學習困難的情況, 心肺功能也會再好一點, 所以應該將39周才當為「足月」云云……不過研究還研究, 世事真係唔一定會跟足自己的心意~

2015年12月8日

BB出世了~

11月尾去完私家醫生產檢, 諗住BB冇咁快出世......點知過多3日, 1/12, BB就出咗世, 剛好足月不久, 37周4日, 比預產日早了2個星期有多~~ BB知道我一放產假, 就即刻出世, 幫我省下假期, 變了前0後10~~

不過照顧BB囡真係好忙, 暫時擺張相俾大家看看, 希望之後可以再同大家分享更多~~ 照顧BB的道路很漫長, 希望BB快高長大, 日日開心、健康、平安~~


晚餐@Ilis~

是日有事去尖沙咀, 晚餐就同老公在附近解決~ 老公話山林道好多餐廳, 果然一小條街, 幾乎間間都係食店, 仲未計樓上店~ 或許這日是平日, 人不算多, 相信周末一定好多人來這裡覓食~

想了一輪, 決定試吓這間西日式餐廳~ 剛巧不用等位, 2人都可以坐4人枱~

話明係西日式餐廳, 於是既有日式套餐, 也有西式食物同意粉~ 老公就決定試吓日菜, 而我就試意粉~ 套餐是不包飲品, 不想另叫就可以飲水~ 侍應 (定係老闆娘呢?) 見到我的大肚子, 特地問我要不要將凍水換成暖水, 很細心~


老公叫了一個吉烈豬扒御膳~ 最初以為都係就咁一碟豬扒一碗飯, 原來這裡較有心思, 提供芝麻及點吉烈炸物的醬汁~ 豬扒和沙律菜都放在架上, 比較貼近日本正宗食法, 唔錯~ 豬扒炸得很脆, 肉質夠淋亦有肉味, 整得幾好~ 如果可以大塊一點多幾舊就更抵食~ 見到鄰枱叫的吉烈海鮮定食都幾好, 證明這裡的定食有一定水準~ 湯同配菜都合格啦~

午餐@Miss Coffee~

之前曾經幫襯過屋企附近的海圖café (請看舊blog), 由於它的生意唔錯, 於是在隔一個舖位的地方開了分店, 就是Miss Coffee~ 這日有時間決定來試吓它的食物, 本來咖啡都想試, 但懷孕期間都係忍一忍口啦~


裝修同海圖的style差不多, 不過第2店的舖面較大, 感覺比較闊落, 而且雖然應該可以坐多啲人, 不過店子內的枱椅不多, 應該都是想製造悠閒感, 不想太擠迫~~


Café的一角~~ 2個人躲在這裡都不錯, 不過我們來到的時候是有人的, 等他們走了才拍的~

孕婦講座 (雅培)

雅培的講座, 之前網上報名是用抽籤方法, 抽了幾次都唔中……之後佢改為用先到先得的方式報名, 又醒唔起晨早8點去睇佢個網頁, 又報唔到, 結果唯有用網上講的方法, 喺診所填了媽媽會表格, 再由診所交去, 結果終於收到邀請出席的sms, 打去熱線報名就成功了……呢個應該係臨生之前最後一個講座了, 之前想去的kinetic同雪印的講座都係抽不中…

說回這個講座, email提醒要準時到, 唔係冇得拎獎品, 於是我們今次好準時, 其他人都係, 10點已經人山人海……第一個題目是嬰兒按摩, 內容都不錯, 不過一次過講好多步驟不容易記住, 可能遲啲要搵書搵youtube再了解一下~ 又是Yoki Pang主講, 之前聽過她講嬰兒早期教育都覺得幾好, 生動又易吸收, 也學了不少技巧~

第二個題目是營養師主講, 又係關於孕婦同bb的營養需要~ 都係當溫書啦~

第三個題目就由張傑醫生主講, 關於bb身體可能出現的不同問題及處理方法, 例如bb有頭泥、鼻塞、嘔奶、懷疑出疹等問題可以如何處理~ 相信他又是很有經驗的講者, 所以又係講得很生動, 冇冷場, 大家都很留心聽~ 唔錯~

最後就係由講座區去到另一個範圍, 可以看到換片示範、餵母乳姿勢示範、營養師解答問題、試飲及訂購媽媽奶等~ 不過更多人都係選擇拎禮物就走~ 我們就每個攤位都看了一會才走~


可能雅培之前出手真係好闊綽, 令到它的口碑唔錯, 咁其實講座的內容都幾好, 深入淺出, 不過如果為了禮物去的話就會有少少失望, 因為較特別的只有胎心機, 紗巾仲要係like同share雅培個FB先有~ 不過我都明淨係胎心機價值都唔少嘅~ 好彩之前冇特別去買部~

如果想報雅培的講座, 最好都係透過在診所填媽媽會表格報名了~

第3次聽新手爸媽講座 (小童群益會)

原來自己寫漏了一次, 10月尾參加過第3次的「新手父母家庭篇工作坊」, 這次題目又係好長, 是「嬰幼兒情緒發展密碼「孩子哭鬧點解決?處理嬰幼兒情緒」工作坊」~

講座的地點在大埔, 對我來說好遠, 又遲到幾乎半小時, 幸好有notes派番~ 講者好似係心理學家, 內容都不錯, 有介紹小朋友由bb至幾歲的情緒發展, 亦有講遇到bb哭鬧的處理方法等~ 例如bb在大約9個月前的哭鬧都係有需要的, 即係為了食、去廁所、不舒服等, 父母應該要即時安撫及處理, 9個月後的哭鬧就開始有時會係故意的成份, 例如故意要扭抱、不聽話之類, 父母就要細心留意, 唔好一喊就抱, 可能有反效果~

在場都有不少家長帶埋bb或小朋友去聽, 這個題目相信好多父母都覺得不容易處理, 希望bb出世之後自己同老公都有智慧、耐心同耐力去處理bb的哭鬧啦~~

禮物同上次一樣, 所以不特別放相了~ 如果有興趣參加可以看看官網: http://www.bgca.org.hk/activity.aspx?id=c5fb6a92-5334-4c38-9560-ca6562519b98&i=486#239f273a-5407-486d-8f08-a9184e1dcd6b

第9次產檢 (37w)

又過了3星期, 又係見私家醫生的日子, 又係遲到, 不過這日冇咩人, 等了不夠半小時就可以睇醫生~~

今次醫生又嘗試給我們看看bb的樣子, 可是她又躲在一邊, 看不到~~ 唔緊要啦, 出世都知道係咩樣~~

下一次見醫生是2星期之後, 都係希望事事順利~~

第8次產檢 (34w)

又過了3星期, 又係見私家醫生的日子~ 這次都係遲了, 都係等了大約1.5小時~ 中途去了PepperLunch食午餐, 味道不錯呀~

今次醫生又嘗試給我們看看bb的樣子, 可是她又躲在一邊, 只看到一隻耳朵, bb你真係好鍾意保持神秘~~ 另外, BB繼續係中等size,一切正常~ 希望繼續保持事事正常啦~ 同醫生講話健康院度到自己輕咗, 但醫生話冇輕到, 希望下一次產檢, 體重都係在正常範圍~

下一次見醫生是3星期之後, 可能醫生覺得我冇咩問題, 唔一定要2星期睇一次, 當係省一點錢啦~希望可以繼續事事順利, bb快高長大~~

第7次去健康院 (35w)

第7次去健康院了~ 這日的「任務」就是驗乙型鏈球菌, 其實最初的步驟都係同平時一樣, 驗小便、體重、血壓, 一切正常~ 體重仲比上次重咗, 應該係因為剛剛幾日前又食祖母生日飯, 又去了親戚的婚宴, 食多咗不少食物~ 希望唔係我重咗係阿b重咗啦~

之後, 就是等姑娘進行「任務」, 原來過程都幾快, 冇咩特別 (喺出面等叫名仲耐~)~ 最後就係見醫生, 今次由醫生度肚同聽心跳, 又係一切ok~ 另外由這日起, 我的健康院file正本就會交俾我, 入院的時候就要帶去, 等醫院知道自己的情況~ 而返健康院覆診都要帶, 健康院就只會keep file影印本~ 要小心保管這份file哩~

下一次去健康院就是37w, 即係bb足月了~ 不過個人好想佢39-40w才出世, 所以bb要乖乖, 繼續喺肚度陪我呀~

2015年11月28日

晚飯@八月~

這間店子開了一段時間, 終於有機會可以試吓~ 這日6點就去到, 不用等位, 2人都有得坐4人枱, 可能因為見到我大著肚子~


這裡的碗碟望落很優雅, 藍色花邊, 個人都挺喜歡~ 近來中式食店都喜歡中西合壁~

2015年11月26日

朱古力蛋糕條~

既然整得朱古力曲奇, 自己又好想整朱古力蛋糕, 於是又實行啦~~


不過比起上次的蛋糕, 今次的成品變了做蛋糕條, 係有原因嘅……

2015年11月23日

栗子甜品@東海堂~

這日吃完晚飯, 很想吃甜品呀~ 幸好老公肯俾我買, 於是就去東海堂買了3件甜品~ 秋天是栗子當造的時候呀~


先試了這個栗子抹茶甜品杯, 上面是栗子mousse, 入面就有抹茶蛋糕及煎茶奶凍, 味道淡淡的, 不錯~

2015年11月21日

懶人朱古力曲奇~

又突然好想食甜品, 剛好又想清吓雪櫃及整甜品的材料, 於是決定先整朱古力曲奇~


俾成品照大家看看~~

2015年11月11日

第5次+第6次去健康院 (32w, 33w)

第5次去健康院遲了一點, 因為原本約的日子成了重陽節假期, 於是就要延後幾日, 於是32w才去看~ 當日都係一切正常, 係等見護士比較久~ 姑娘話33w同35w再見啦~

第6次就只係隔了一星期多啲~ 大部份環節都順利, 係唔知點解姑娘話我輕咗少少, 見完護士之後要再見吓醫生, 於是等多幾乎半個鐘~ 好彩醫生都係講幾句, 話要小心飲食, 注意營養, 跟住就走得~

下一次35w見醫生同護士, 就要驗乙型鏈球菌, 希望到時咩事都冇就好啦~~

快餐@Pizza hut, Triple O's~

成個孕期其實真係好難唔食快餐, 忍不住口M記都吃了一兩次, pizza都食過幾次, 今次記吓去食pizza hut同食漢堡包~


大部份Pizza hut都是餐廳型式, 即是由侍應協助落單, 這次幫襯的pizza hut是近來新開的, 係用快餐店型式, 自己搵位, 自己去counter買食物, 買完就有店員送過來或自己拎食物~

這間pizza hut 快餐店面積不大, 不過都有幾十個位, 剛好是平日晚上, 人不算多~~


先來的是忌廉雞湯, 飲品同甜品 (oreo木糠布甸), 唯有掉換次序, 先食甜品~ 甜甜哋有朱古力同oreo味, 都算不錯的~

2015年11月9日

午餐@81BAN (81 Ban Japanese Deli)

又有機會去食吓呢間西日式的店子~ 之前吃過它的早餐都算覺得唔錯, 唔知午餐又如何?~

可能中午吃午餐的人都選了其他食店, 呢間不算多人, 一去到就有位~ 不過有些位置會俾太陽曬到, 我們坐的位置後來都有陽光, 有點熱...


老公叫了一份西班牙菠菜炒蛋意粉~ 其實唔係好明同西班牙有什麼關係, 不過試了少少, 覺得炒蛋同菠菜都算好食, 白汁味道都ok, 不會太淡太鹹, 不過整體都係合格, 未算好特別~ 老公覺得60蚊一份貴了一點, 自己就覺得尚可啦~ 不過男士係可能唔夠飽的~

2015年11月1日

晚飯@泰味村新恆福菜館~

呢兩三個星期自己或老公在工作上都好忙, 連找食都懶了, 都係搵番屋企附近的食店來開餐~~

泰味村是屋企附近薄有名氣的泰式餐廳~ 近來看到它裝修, 有懷疑過係咪關門大吉......點知原來變了一間泰式+中式餐廳, 仲改了一個頗長的名字~ 既然有點改變, 不如又去食吓啦~

去到的時候, 時間尚早, 不用等位, 有卡位坐~ 分別看了泰式同中式餐牌, 都係想叫泰式食物多啲, 結果冇食中式小菜了~


叫了一份泰式燒雞, 100蚊半隻~~ 味道都不錯, 外皮脆脆的, 肉就比較熟, 但個人覺得食雞都係熟啲好~ 其實雞本身的味道同中式一樣, 只係多了一碟泰式醬汁, 少少酸少少辣, 幾惹味~ 是汁料做得唔錯, 加了少少分, 雞就合格啦~

2015年10月22日

晚飯@正宗上海生煎皇~

這日下午約了2個朋友仔去旺角迎囍飲下午茶~ 我同其中一位朋友都會做羊年媽媽, 另一位朋友就會做猴年媽媽, 真想不到大家會在相近的時間懷孕呢~ 所以話題都離不開各種關於懷孕的事~

之後酒樓話要落場, 於是再同其中一個朋友去許留山食甜品繼續傾~~ 傾到6點幾, 終於老公特閒來接我了~~

既然下午又食了點心又食了甜品, 於是晚飯就簡單一點, 行過標榜是明星開的"正宗上海生煎皇", 剛好不用等位, 就入去食吓~~


先叫了一份生煎包, 以前見到雜誌介紹話好好食, 31蚊4粒不算平, 試一試味道先~ 皮都算薄及脆, 而且入面的肉都不少, 亦有肉汁, 都算OK, 可是不知是否一早整好, 上枱的時候已經凍了一點, 不夠熱辣辣, 似乎以前食過的祥興記仲好食啲~~

第7次產檢 (31w)

又是去看私家醫生的日子~ 這次遲了一些去到,計埋等了大約1.5小時~ 都係嗰句,為了見吓BB,就算要等耐一點都冇問題~

今次終於見到少少BB的樣子,見到鼻子同嘴巴,不過眼睛就遮住了,但係第一次算係見到正面已經不錯了~ 另外BB繼續係中等size,一切ok~ 希望繼續可以保持下去~

不過自己唔知咩原因輕磅了一點,可能因為之前病過吧……希望之後可以增番一點磅數~ 這日醫生心情不錯,幾有笑容,可能因為休息了一段時間,「叉夠電」,都係好事呀~

下一次見醫生又係3星期之後,愈來愈近足月的日子,希望可以繼續事事順利~~

2015年10月18日

晚飯@泰式素食~

來到九龍城, 泰式餐廳周圍都係, 要突圍而出真不容易, 唔知整素食係咪其中一個突出的方法呢? 於是決定試吓這間素食店~

店子不大, 只有十多個位, 6點幾去到, 都幾乎坐滿, 差點以為要等位, 不過原來店子用埋鄰舖, 剛好有2人位, 於是唔駛等~


我們兩人胃口不大, 於是叫了3碟餸試吓~ 很快就有得食~


先來的是串燒沙嗲~ 唔知係用咩嚟扮肉呢? 我覺得係薯仔, 不過可能又唔係只得薯仔, 味道食落唔錯, 沙嗲醬都幾好食, 如果多一點花生更好味~ 58蚊, 如果多一兩串就抵食啲~

第6次產檢+第4次去健康院 (28w)

很快又過了一個月, 係時候做檢查, 謝謝老公特地請假陪我~ 上午先去看私家醫生~ 可能因為醫生放假3星期, 於是平日睇都要等幾乎一個鐘~ 雖然要等得耐, 不過可以見到BB都開心~ BB都係很正常, 中等size, 不錯~ 可是這個月不知是操勞了一點還是感染了病菌, 傷風了幾日, 唯有問醫生攞藥食, 又攞了一日病假~ 下一次見醫生就是3星期之後~ (後記: 依家已經好番哂了~~~)

下午就去了健康院~ 都係磅重、量血壓、驗小便, 一切都OK~ 之後見護士, 問吓近況, 量肚皮, 聽聽BB心跳, 又是一切OK~ 最後去藥房拎materna就走得啦~ 希望之後的檢查都係正正常常, 冇咩特別就好了~~~

下一次去私家醫生同健康院的時間又相隔一星期有多啦~~

2015年10月13日

晚飯@莆田~

近來公司同家中都開始忙碌, 都未必成日有時間更新blog哩, 希望自己可以keep住寫吓就好啦~

臨近中秋節時, 老公又有得揸車, 於是選了有3小時泊車優惠的荷里活廣場逛逛~ 只需要出示一張紅葉照片就可以泊車免費, 幾抵~

不過這裡的特色餐廳不算好多, 於是決定試吓之前雜誌介紹過的莆田~

臨近做節, 侍應話只可以食一個鐘就要走……不過以我們的食力, 一個鐘夠哂~


先叫了一份豆腐作為前菜~~ 諗住會唔會比平時的豆腐特別一點, 結果味道普通, 總之試吓很多人都推介的九轉小腸~

2015年10月7日

孕婦講座 (惠氏) + 新手爸媽講座 (小童群益會)

惠氏的講座都不算難報名, 報了2次就抽中咗~~ (最難報就係雅培, 抽了4次都冇份, 可能第時唔揀呢隻奶粉, 哈~) 今次就去九龍富豪酒店參加~ 中午老公有點事辦, 於是第一次自己聽~ 都幾乎坐滿哂, 有成二十幾圍~~

講座第一部份關於準媽媽的營養, 第二部份就是照顧BB實習~ 內容其實之前聽過不少, 而且又係「試玩」玩具BB, 不過當溫書都OK, 而且講者的表現都算生動, 所以不算好悶~ 不過時間就有點緊湊, 遲了完結, 於是即刻趕去鑽石山聽另一場講座~

2015年10月3日

牛油磅蛋糕~

又好想整啲又簡單又好食的甜點俾自己同老公食~ 今次整吓蛋糕基本入門的牛油磅蛋糕~


成品看來都不錯吧~

2015年9月29日

參加Nutricia白金版媽媽教室~

之前看到Nutricia的FB, 可以報名參加它的媽媽講座~ 於是試吓報名, 又得咗, 遠啲都去聽吓~

地點在牛頭角如心艾朗酒店, 都幾近地鐵站, 不算難找, 而且酒店設計幾新式, 但俾啲工廠大廈圍住~ 同平時的講座不同, 大家是一圍圍坐, 而且參加人數不多, 約50對夫婦, 當然也有些自己來的太太~

因為又遲了少少, 去到已經玩緊一個小遊戲, 係bingo遊戲, 在紙上答些有關懷孕及照顧bb的問題, 和同枱其他太太傾吓對答案, 有3個答案一樣就bingo, 可以攞2盒NutriciaMama魚油丸~ 雖然遲到, 不過幸好和隔離的太太好快找到3個一樣的答案, 很快就拿了禮物~

2015年9月23日

午餐@茶木.台式休閒餐廳~

之前都想試吓呢間餐廳, 不過有幾次行過都好多人等位, 這次看完醫生, 上到去, 剛剛仍有位, 所以不用等, 幾好彩~~


餐廳剛剛出了新的餐牌, 看來很新淨~ 不過冇深究係咪真係有秋天的特色食物~~

來到這裡當然想食甜品, 叫了一份草莓香草蜜糖磚塊~ 另外都要吃點熱食, 於是叫了一碗紅燒牛肉麵~

2015年9月21日

晚飯@麻布茶房~

當又要想想去哪裡吃晚飯時, 醒起自從上次吃了麻布茶房的甜品, 很久沒有再去過, 今次去試吓晚餐啦~~ 可能因為平日, 所以人不多, 不用等就有位~~


我們每人叫了一份定食, 我的就是日式照燒雞扒飯~ 擺上枱面時, 發現原來不只是有雞扒飯及麵豉湯, 還有一些不同的配菜, 有凍的玉子塊, 雜豆, 蓮藕加紅蘿蔔, 仲有酸瓜同酸蘿蔔, 有趣的配搭, 味道也不太差, 個人比較鍾意酸瓜同酸蘿蔔, 少少酸比較開胃~~

2015年9月17日

參加鮮果拿破崙製作班~

上次報曲奇餅班的時候, 還有報了另一個課程, 就是學整鮮果拿破崙~~ 又有老公陪住一齊學, 很開心呢~

不過今次比起上次整曲奇餅就難一點, 因為要自製酥皮~ 原來都有不少工夫, 例如材料撈好之後要雪凍, 麵團拎出來之後, 加入牛油搓的時候, 又要好小心, 確保牛油均衡地分佈在麵團內, 焗出來的酥皮才會鬆脆及漂亮~ 而且20個人一齊上堂, 地方不大, 導師又要逐個睇住我們搓皮, 以防我們整錯, 於是要分3次整, 就要用多啲時間~


搓好之後, 放入焗爐, 終於等到自己那份酥皮出爐~~ 可惜放了在焗爐較受熱的位置, 於是面層有點燶~~


導師另外示範了如何整吉士忌廉, 之後他就逐個幫我們唧忌廉在其中一塊酥皮上~


舖好已切的士多啤梨片之後, 又唧一層忌廉~~

2015年9月13日

醫院物理治療班 (23w)

差點不記得記下這個~ 最初看了其他準媽媽blog的介紹, 都覺得如果有機會參加, 可以多學些運動或知識~ 有些醫院以前要上網報名, 有限額, 滿哂就冇, 或者要自己同健康院講想去上堂才有轉介, 唔知依家仲係咪咁難報名, 不過屯門醫院似乎好少少, 只要參加它的婦產科講座 (物理治療師主講的那一場), 懷孕周數適合 (好似係16至30周), 就可以即場報名, 即日知道幾時去上堂~ 佢會當收新症, 有張藍色應診紙, 之後又可以有到診紙, 就可以拎病假去聽了~

不過唯一覺得驚訝是每人收100蚊, 只可以孕婦參加, 如果係公務員或公務員家屬就可以唔駛俾錢~ 唔知其他醫院的物理治療班要收錢嗎?~

當日去到, 首先就係去繳費處俾錢, 之後就可以上堂~ 當日物理治療師介紹不同的產前運動, 主要是伸展運動, 還有生產時的不同呼吸方式, 亦有鍛鍊會陰肌肉的凱格爾運動等~ 介紹完之後就有實習時間, 每人都做咗一次俾佢睇, 等佢可以矯正我們的姿勢~ 最後就是問答環節~ 上完一個鐘就走得啦~ 看網上的資料, 以前上這些班有得試玩生產球之類的運動, 又好似有2堂可以上, 依家似乎取消了, 唔知點解呢? 不過都算一個有趣的體驗, 亦派了2張單張, 可以跟住做吓運動, 都唔錯~


第5次產檢 (24w)

等了2個月, 又是去見黃醫生的時候~ 今次約了10點, 等了1.5小時~ 中途去了行先施百貨, 雖然有減價, 但係冇心水貨品想買呢……

這次量血壓、驗小便都正常, 而體重都有增加, 一切ok~ 醫生照超聲波, 都說一切正常, bb都係中等大小~ 看來我的產檢記錄會愈來愈短啦, 不過一切正常絕對係好事~ 希望bb繼續健健康康, 快高長大~

下一次看醫生就是月尾, 第一次同健康院檢查約埋同一日~~

2015年9月11日

第3次去健康院 (24w)

隔了幾乎6個星期, 又是到健康院覆診的日子~ 今次比上次約得較早, 1:45, 點知早少少去到, 已經排長龍, 因為好多人都想快啲睇完快啲走~~ 幸好這次都排得不算後, 第15個~

其實程序同上次差不多, 等了一會, 就去磅重、驗小便、仲有量血壓~ 這次都係一切正常, 當然又重咗~ 從來都未試過去到呢個重量, 但仲會繼續重下去~ BB的健康當然重要, 不過都唔想重太多, 唔係生完之後驚好難減肥哩……

再等了一段時間就見護士~ 今次連醫生都唔駛見~~ 護士有度肚, 亦可以聽吓BB的心跳~ 有幾個星期冇聽, 雖然其實BB一早已經不時會踢肚, 活躍地表示她的存在, 不過聽到心跳仍是覺得有趣的~ 聽完之後, 問了一些問題, 拎了假紙及藥紙, 約了下次覆診日期, 去藥房拎materna, 又走得啦~

多口問了護士有冇得做飲糖水的測試, 護士話因為自己不是高風險孕婦, 所以健康院不認為我要做, 如果想做就要自己去搵私家醫生做~ 最初聽到話唔駛做都幾開心, 因為人人都話杯糖水好難飲, 不過後來諗吓, 唔做係咪可能唔知道自己有風險呢?......但老公同家人都覺得, 既然健康院覺得OK, 都唔需要做了~ 咁就決定係咁先啦~~

2015年9月10日

孕婦講座 (智多健)

之前在BB展收到不少單張, 其中一張就是可以打去報名參加智多健AAA的講座, 既然在屋企附近, 於是就打電話報名參加~

地點在大會堂的演講廳~ 主辦單位真係計得好盡, 坐滿哂~ 由於個講座有講奶粉同DHA丸, 所以不少媽媽帶同BB出席, 連BB車都唔夠位泊, 而且一邊聽講座, 一邊好多BB的哭叫聲~ 其實BB真係唔會有耐性參加呢啲坐定定的活動, 不過媽媽們要來聽講座及拿禮物, 冇人睇住BB, 唯有帶埋一齊嚟~ 個人覺得BB出世之後, 自己寧願在家湊住, 除非講座的題目/禮物好吸引, 唔係都未必再參加了~

說回講座的內容, 其實就是介紹這個牌子的奶粉及藻油DHA丸的成份有多厲害~ 例如這隻奶粉的營養比其他牌子多, 質素又比較高, 接近甚至比母乳更好, 小朋友食咗更乖更叻之類~ 另外DHA不是由深海魚提煉, 避開有害水銀等重金屬物質, 值得買來食之類~ 聽完係了解這個牌子多咗, 不過個人就唔會因為一聽完就即刻買它的產品, 要試過先知好唔好……


所以主辦單位都有送DHA丸試用裝及奶粉試用裝, 還有一份尿片墊及一支藥膏試用裝~ 另外屈臣氏都有贊助, 送了紙巾、濕紙巾及膠布, 另外在門市購物有折~ 不過這日真係諗唔到想買咩, 於是冇買, 只係去店舖排隊拎了贈品就走了~ 其實呢個安排都幾麻煩, 因為要特地行去店面排隊, 又俾商場其他人望住, 以為有什麼派, 而且店內本來有的客人好似都嚇走哂, 結果得番我們這些拎贈品的人, 其實都幾奇怪~ 不過其實禮物真係不算差, 都係唔好抱怨太多了~~

2015年9月8日

晚飯@江南美廚酒家

之前在網上見到團購, $138有個2人餐, 是吃上海菜的~ 既然去翡翠、小南國等食店吃一餐都唔止呢個價錢, 決定一試~ 這次選了去元朗的分店~

去到, 時間尚早, 人不多, 可以坐卡位~ 這個餐有些食物可選擇, 有些就是指定的~ 揀完就等食啦~


先來的是指定的湯, 雲吞雞湯~ 湯的味道就普通, 有一粒大雲吞, 仲有一兩舊雞肉~ 不算很好喝, 但合格的~


之後來的2個前菜, 我們選了麻醬雞絲粉皮及鎮江餚肉~ 雞絲粉皮的麻醬味道不錯, 幾好食, 其實食粉皮都係醬汁緊要~ 而餚肉就鹹鹹的, 味道尚可~

2015年9月6日

參加曲奇餅製作班~

自己好耐冇整過曲奇餅, 而且希望參考不同的食譜, 再實際練習一下, 成功機會大啲, 於是報了工聯會學整曲奇餅~ 包括杏仁曲奇、朱古力合桃曲奇、還有唧花曲奇~~

未去學之前就食個午餐 (因為是下午堂)~ 今次老公都有興趣一齊學, 當然開心啦~~


去了Food court吃飯~ 好多大陸遊客, 幸好已過了最繁忙的午餐時間, 都找到位坐~~ 自己好耐冇食過Pepper Lunch, 於是叫了一份漢堡扒拼雞扒~ 味道都可以, 不過都係覺得黑椒牛肉好食啲~~


老公就想食麵, 又好耐冇食過味千拉麵, 於是叫了一碗~ 看來比我那個好食多了, 總之都係食拉麵~ 不過就要等10分鐘先有得攞餐~

食飽飽就去上堂~~ 阿sir同助手很快就幫我們量好哂材料, 放哂在大碗內~ 先整朱古力合桃曲奇, 牛油、麵粉、黃糖、合桃碎、仲有朱古力粉, 全部喺哂碗內, 我們將它們撈埋一齊, 搓成麵團之後, 將它們分成一個個小圓形, 放在焗盤上, 鍾意的再加入爐朱古力粒喺上面做裝飾, 就可以拎去焗~ 焗完18分鐘就有成品~ 好容易整~~


焗完出來很香呀, 而且味道不錯, 脆脆的~ 原來不加雞蛋, 就可以令曲奇餅脆一點, 唔學過唔知~~

2015年9月2日

新手父母講座 (小童群益會)

有天看報紙, 原來政府 (民政事務局同家庭議會) 找了小童群益會合作, 在不同區舉行多個 “新手父母家庭篇” 的講座及工作坊~ 既然第時就會係新手父母, 聽吓都唔錯, 於是又報名參加~

這個系列共有6個講座, 它們不是順序舉辦, 而且不定期在不同區講不同的題目, 這次參加的是 “照顧BB多法寶:「BB病了怎麼辦及與上一代協力照顧BB」工作坊”, 地點在炮台山~ 都幾遠架, 不過抱住八卦心態聽吓, 亦希望有所得著~

2015年9月1日

午餐@What The Pho (囍越)

這天行商場, 發現未食過這間食店, 於是又試吓~ 唔駛等位就入得~


夏天我很喜歡食凍檬, 因為酸酸甜甜很醒胃, 不過 “生”菜就比較多, 所以都唔可以成日食~ 這份香茅豬扒凍檬個人都覺得唔錯, 豬扒幾厚身, 上面有很多花生碎, 而且調味覺得幾好, 唔會食落冇肉味~ 這間餐廳的凍檬汁味道都好, 酸味調較得合我心水, 唔係間間越式食店都好味的~ 唯一就係檬粉的份量少了一點, 食完都係剛剛飽~

2015年8月27日

參加玻璃盆景班@Object Design~

之前同朋友仔在groupon見到團購, 2百幾蚊2個人一齊去整玻璃盆景, 於是就一齊去報名玩吓~


成品看來都不錯呀~~~

2015年8月26日

晚飯@醉上海~

通常吃上海菜都是幫襯連鎖店或較出名的食店, 有日行過見到一間未食過的小店, 就試吓它的水準如何啦~


小籠包: 不過不失, 雖然肉味都不錯, 但皮都係厚了一點~ 都係x翠或x泰豐比較好味~

2015年8月24日

檸檬杯子蛋糕~

為了健康著想, 近來都是少吃了零食, 但有時真係好想食吓餅乾、蛋糕嘛, 不如都係自製, 就會少啲機會食到添加物了~ 剛巧屋企買了檸檬, 不如就參考一下他人的食譜 (網頁都在下面), 整吓檸檬小蛋糕~


好似影到好大個, 其實是迷你小蛋糕來的~~

2015年8月21日

參觀機場核心計劃展覽中心+海美灣~

為何突然想去這個地方? 因為借了親友的車, 想揀個近近哋看風景、又有車位的地方~ 另外, 自己在公路上見過這個地方好多次, 有興趣知道這個小小的展覽館有什麼看, 於是出發啦~


外表看來不太舊, 但原來它的原址是私人住宅, 建於60多年前, 本來叫「白樓」, 之後政府收購它作為宿舍, 後來評為三級歷史建築, 依家就是展覽館了~


不過, 最初諗住冇咩人的地方, 都泊滿了車, 因為原來附近有個小海灘, 有些人架車來游水、玩水, 於是小小的停車場不夠位……幸好我們等了一會就有架車離開, 就可以泊個正當車位, 唔係就要 “非法”泊車了~


這裡位於青山公路~ 這條沿海公路經過多次改建, 和以前已經面目全非~ 好耐以前它真係幾乎貼住海岸, 依家已經有所不同~


由正門行入去~~


這裡主要介紹政府在近20年的大型建設, 包括青馬大橋、機場、3號幹線等等, 統稱10大基建~ 由於有些工程早已完成, 於是這裡的展品同介紹都已經有點歷史, 看來有點舊, 不過重溫一下香港各個重要建設的過程都不錯的~ 而且這裡方圓幾里, 有冷氣又免費參觀的地方就係得呢度, 所以大熱天時入來休息一下都好架…


青馬大橋的模型~ 展覽館入面仲有其他模型, 例如機場一號大樓~


地下和一樓 (天台), 都有觀景台同幾部望遠鏡, 可以看看青馬大橋及周圍的風景~


天氣好, 看風景真係特別靚~ 雖然其實已經看過N次, 不過都係唔厭架~

2015年8月19日

晚飯@OVOCAFE~

懷孕時期, 老公覺得出街食都盡量選一些標榜健康或清淡的食店 (其實最後都係想食咩就食咩:P)~ 我自己都係想揀些特別、而且好食的店舖, 不過其實這2個方向都唔會有衝突的, 因為健康的食物都可以好食又特別架~ 今次就有機會試吓這間西式素食café~

去到覺得裝修好有心思, 周圍都是植物~ 而且café隔離就是一間花店, 挺有園藝的氣息~ 不過晚餐的選擇不多, 於是我選了一份all day breakfast, 老公就叫了一碟意粉~ 可惜我倆都不好咖啡, 聽講這裡的咖啡沖得不錯, 但冇機會試啦~


老公叫的闊條麵 (全名是: 黑水欖蕃茄乾松子仁香草闊條麵), 賣相都不錯, 而且味道亦唔錯, 有各種蔬菜味道, 還有松子仁, 添上不同的口感~ 可是份量真係唔多, 幸好這日老公吃了個很飽的午餐, 不然他一定抱怨份量不足~

2015年8月17日

近來的零食~

懷孕階段, 個個都說要小心飲食~ 自言薯片汽水朱古力都盡量唔食, M記、KFC都幾乎唔去, 但係總是有 “口淡淡” 、好想吃零食的時候, 於是唯有盡量小心去揀一些看來比較健康的零食~

自言不是營養師, 對營養標籤也不是很在行, 所以唔一定揀得啱, 大家都要自己衡量是否可以食呀~~


在M&S就見到這種餅乾 (17蚊有12塊)~ 最初以為似梳打餅, 原來食落似酥餅, 不過薄啲又脆啲~ 就咁食有少少鹹味, 如果覺得味道較單一, 可以在上面擺健康的配料一齊食 (例如水果片), 自己就試過搽果醬食, 老公就試過擺芝士~ 不過好多牌子的片裝芝士都有防腐劑, 要小心選擇~~


這是營養標籤, 大家可以自行研究一下~ 看來除了鹽分高了一點, 其他似乎都可以啦~

2015年8月13日

參觀荷花BB展~

對於各媽媽來說, 每年2次的荷花BB展是不可錯過的盛事, 因為可以幫BB或小朋友買嘢, 或者去拎免費贈品~ 自己未去過, 當然想去湊吓熱鬧~ 幸好老公都可以放假一齊去~


參考了網上資料和很多媽媽/準媽媽blog, 自己很努力找免費門票, 見到FB、網頁、雜誌、報紙有什麼抽獎都試吓, 很幸運在明報happypama抽中了4張, 在司各脫FB遊戲抽到2張票, 再加上參加美贊臣講座的2張票, 總共有8張~ 我們結果去了2日, 吃飯時間就行出去食嘢休息一下, 之後再入場, 就幾乎用盡了這些免費票啦~

出發之前參考了網上他人的經驗, 整個人資料label, 預備貼入優惠劵書仔內 (例如姓名、性別、電話、email、地址、預產期、醫院、身分證頭4/5個字等)~ 大約整50個已經好足夠, 因為唔係間間公司/機構都要好多資料, 有些需要的資料不多, 寧願用手再填, 可以減少個人資料外流, 不過想快, 貼label係快過手填~ 另外有些劵要個人簽名或填一些label沒有的資料, 要留心, 所以點都要帶多一支筆架~

產前講座 (U周刊 x Watson’s)

(因為之前去了幾個講座, 為了清一清吓記錄, 一次過出了幾篇blog, 都是同講座有關~~)

有日看剛買回來的雜誌, 發現了這個免費講座~ 雖然地點真係幾遠, 不過都試吓去聽啦~~


產前講座 (美贊臣)

美贊臣的講座比較特別, 如果去它的網頁, 似乎找不到什麼資料, 但原來它的講座很多都是「健康創富」(Health Plus) 協辦, 於是就要去HP的網頁才成功報名~

產前講座 (美素佳兒)

終於參加到其中一個 “大型”講座~ 很多blogger媽媽都話唔可以錯過幾大奶粉商的講座, 因為禮物不錯, 招待也很好, 通常都在酒店舉行~~ 不過真係幾難報, 暫時雅培抽了幾次都唔中~ 惠氏、雀巢又成日錯過咗, 爆哂冇位~~ 唯有美素佳兒, 一喺網頁登記想參加下次講座, 就有sms來話可以報名, 即刻打去留位, 就成功咗~

不過今次又遲到, 去到第一個題目又講咗一大半……係關於 “懷孕期媽媽及寶寶十大營養須知”~ 不過都記得有講媽媽適宜/不適宜吃什麼, 另外當然就係講吓美素佳兒的媽媽奶粉同BB奶粉有什麼好處啦~ 即場訂媽媽奶粉仲可以得到一部胎心機或者一次照顧BB的實習課堂, 不過因為自己試過飲另一些媽媽奶粉的試用裝之後, 總是肚子不適, 所以唔敢訂一罐呀……其實想要胎心機, 不過老公話摸多啲BB有冇踢自己都得啦, 都係嘅……

產前講座 (BB Care)

趁住近來肚子不算好大, 亦算有精神, 於是見到不同講座都報名, 希望抽中參加就可以盡早去聽, 不用之後頂住肚子去聽太辛苦~ 其實醫院的講座自己都有聽架, 不過因為機構舉行的講座都有少少相 (例如禮物~), 就講多啲啲啦~

這個是第二次抽中的講座, 又係去觀塘, 其實交通都要幾多時間, 不過既然有免費講座同禮物, 辛苦少少都去體驗吓~

2015年8月12日

照結構 (21w)

做過OSCAR,下一關就是所謂的 “照結構”~~ 睇番醫生張轉介紙, 全名叫 “高解像胎兒結構超聲波素描”, 簡單說就係用超聲波仔細檢驗BB身體各部份, 以確保BB成長進展正常及跟隨發展水平~

唔知什麼原因, 自己睇開的黃醫生係冇呢個服務, 於是轉介去看另一位羅醫生~ 約了早上9:30, 一入到去已經有幾個人等緊, 仲多人過自己睇開那位, 而且其實醫務所正式係10點先開, 大家都係唔想等太耐先早啲去……不過這日我係 “打尖” 嗰個, 因為我要照結構, 醫生第一個就見我先……好彩, 唔係真係唔知要等幾耐先有得睇……

2015年8月10日

第二次去健康院 (18w)

隔了幾乎6個星期, 終於再去健康院覆診~ 今次比上次簡單, 等了一會, 就去磅重、驗小便、仲有量血壓~ 最唔方便就是量小便, 早上就要擺個樽喺手提袋度直到下午, 總是怕樽口不夠緊, 漏了出來就很麻煩……不過為了測量健康就冇辦法啦……

2015年8月9日

晚飯@點心瑪莉~

很難得又有一間新食店開在屋企附近, 於是趁有機會去試吓~


原來找了吳若希當代言人~~ 這本menu設計得挺美的~

這裡是不收茶錢, 不過要另外點飲品, 因為一杯水或茶都要6蚊, 反而叫一壺茶就15蚊, 可以2個人分的~ 我不太想喝茶, 因為只有鐵觀音、普洱或玫瑰花茶揀, 所以都係叫了一杯水同一杯茶, 但唔知係咪侍應miss咗, 遲遲都冇杯水飲吓, 要我們再同他們說一次才有……


都係說回食物啦~ 這份是「真係冬菇包」, 真係整到2舊冬菇咁, 是近來新興的造型點心之一, 菇菇的啡色其實是用可可粉整的~ 入面是冬菇餡, 不算好鹹, 味道尚可, 起碼好食過之前在X泰豐吃過的香菇包~ 不過如果份量再大一點就好了~ 一籠要18蚊架~

2015年8月7日

產前講座 (Baby Planner)

第一次抽中了參加講座~~ 這個講座是由Baby Planner和Weleda舉辦的 “有機BB皮膚護理” 講座~ 一放工就去尖沙咀會合老公, 吃過晚飯 (就係去一風堂), 去了觀塘聽講座~ 遲了少少, 去到已經開始咗, 而且幾乎滿座, 好彩都仲有位~


一聽講座就會見到的bb公仔~ 這次有得玩吓~

第二個孕婦講座~

在網上找了點資料, 除了媽媽會之外, 很多親子雜誌 / 網站都有孕婦或BB講座, 今次就報名參加 “Babynews親子雜誌”的講座, 關於如何餵哺母乳及BB出世所需要打的疫苗~


因為在平日晚上, 所以放工趕去尖沙咀, 吃了個大X樂晚飯, 都係遲了少少先上到去~ 這次就比上次的講座多好多人, 幾乎坐滿~~