午餐@What The Pho (囍越)

這天行商場, 發現未食過這間食店, 於是又試吓~ 唔駛等位就入得~

夏天我很喜歡食凍檬, 因為酸酸甜甜很醒胃, 不過 “生”菜就比較多, 所以都唔可以成日食~ 這份香茅豬扒凍檬個人都覺得唔錯, 豬扒幾厚身, 上面有很多花生碎, 而且調味覺得幾好, 唔會食落冇肉味~ 這間餐廳的凍檬汁味道都好, 酸味調較得合我心水, 唔係間間越式食店都好味的~ 唯一就係檬粉的份量少了一點, 食完都係剛剛飽~

老公叫的是火車頭湯檬粉~ “火車頭”即係大堆頭, 入面有不少肉食, 例如牛丸、牛肉、牛柏葉等~ 自己吃了一兩舊牛肉, 味道就淡了一點~ 老公就話整體普通, 不算難食, 但亦不算好好味~

這間食店沒有午市套餐, 飲品要另叫, 每杯最少都廿幾蚊, 都係攞2杯水飲, 好彩水係唔收錢, 但要主動問侍應才有~

埋單百幾蚊, 不算好抵, 不過侍應服務都勤快細心, 但鄰枱漏了單, 要催先有得食... 如果它可以推出一些套餐, 應該會更抵食, 到時考慮再幫襯啦~

其實這區的越式餐廳不少, “小巴黎”最出名而水準比較穩定, 成日好多人, 不過愈來愈貴, 而且坐得好唔舒服, 因為枱位好迫, 多人搭枱…… “越棧”坐得較舒服, 有套餐揀, 比較抵食, 不過分店水準不一, 一間整得好食啲, 另一間就未必好食……小本經營的, 喺呢區就真係冇食過一間係好的, 想食好味的越菜, 可能都係第二個區好啲啦……

https://www.facebook.com/WhatThePhoHK

http://www.openrice.com/zh/hongkong/restaurant/%E5%B1%AF%E9%96%80-%E5%9B%8D%E8%B6%8A/431942?region=0&s=3

http://reporterm.blogspot.hk/2014/12/what-pho.html