蝴蝶酥~

又係懶人想整簡單甜點的時候~~ 今次就試吓整蝴蝶酥~~

網上已經有好多食譜~~ 所以都係"集大成", 即係參考完各個食譜之後就試做了~~ (網頁在最後)

就咁睇成品個樣都可接受啦~~

材料有: 急凍酥皮一塊、砂糖一包、牛油溶液 (隔熱水溶一湯匙牛油就足夠)~

將酥皮從雪櫃取出解凍 (約需5-10分鐘), 之後在枱面舖一層膠枱布或膠墊, 在枱布上灑上砂糖, 之後放酥皮在上面, 輕輕壓一壓, 讓砂糖黏在酥皮上~~ 之後當然要灑砂糖在面~~ 鍾意甜啲就好似我咁, 落多一點~~

之後, 將酥皮向內對摺2次~~ 摺的時候輕輕壓下便可, 因為太實的話酥皮焗的時候很難爆開~~

摺好成一卷之後, 如果覺得酥皮變得軟身, 可以放回冰箱, 急凍20-30分鐘, 令它重新變硬, 就會比較易切開~~ 唔係既話, 即卷即切都得~~

我自己就都係將卷子雪一雪, 之後再拎出來切~~ 每份約闊1-1.5cm, 太厚的話, 中心位置可能唔夠脆~~

之後放在已墊牛油紙的焗盤上~ 這時可以用手稍為整形, V形或少少屈曲都得~~ 我用的牛油紙在Aeon 12蚊店買, 焗的時候同焗完都冇黏住啲蝴蝶酥, 質素ok~~

之後就是放入已預熱的焗爐~~ 我最初用180度, 但似乎唔夠熱, 於是開到200度, 焗了約20分鐘, 之後就取出, 將它們反轉, 再焗10分鐘~~

不過我個焗爐火力不太平均, 放在最入的, 最後都比較焦, 有幾塊甚至燶燶哋......於是反轉的時候即刻幫佢哋換位, 情況改善了少少~~ 大家製作時都要睇實個焗爐, 按情況調節火力同位置~~

結果形狀麻麻, 不過總算焗熟了~~ 少少金黃已經挺好看~~

放在花碟上, 看來都算吸引呀~~ 即刻食了幾塊, 甜甜哋幾好食~~ 老公都話唔錯~

大家有興趣可以看看以下的食譜, 有更詳細的作法~~ 下次自己想試吓加肉桂粉或其他材料, 應該會更美味呀~~

http://sweetheartkitchen.com/recipes/palmiers/

http://i-cook.appspot.com/recipe?id=24

http://sallykitchenbakery.chiba78.com/articles-20715.html

http://family.esdlife.com/recipe/detail/417

http://joycemiaka.blogspot.hk/2014/07/blog-post_8815.html