終於有點時間寫寫今個復活節的小旅行~~ 既然荷包要"休養生息", 返大陸就是其中一個旅行好選擇, 這次還同家人一齊起行~~ 考慮過後選了去韶關, 第一未去過, 第二就係想看看標榜為"世界自然遺產"之一的丹霞山, 還有廣東人的發源地: 珠璣行, 所以就報了~~ (上圖就是丹霞山其中一個景點~ 遲些再介紹~~)
選了紅假第一日出發, 換來的就是過關人山人海......這次跟團指定在福田過關及上車, 我們已經預早2小時坐的士去, 都要塞了差不多一小時車, 過關又迫了一小時先過到去福田地鐵站......大家都話試過一次, 下次一係預先申請大陸E-道, 一係去深圳灣那邊過關仲好~~ 最後, 好彩只係比集合時間遲了5分鐘, 但等埋其他團友又等咗成個鐘......當時個地鐵站大部份都係香港團, 證明大家都要離港散心一下~~
等齊人之後 (原來我們的團有成45人...), 就開始趕車~~ 先由福田站去到深圳高鐵站, 由深圳坐高鐵去到廣州, 再轉去北京的高鐵, 因為途中就會經過韶關~~ 話名趕車, 真係遲一分鐘都搭唔到, 好彩大家都係香港人, 趕慣, 所以都可以一take過~~
這個是廣州高鐵站~ 大到好似機場咁, 當然人都好多~~
其實高鐵開咗咁耐, 自己都係第一次坐, 真係"大鄉里"~~ 所以點都要影張相先~ (其實深圳福田線都係第一次坐咋~~~)
第一次坐當然要看看高鐵開得有多快~~ 看住標示的數目不停升, 終於去到302km/h~~ 坐在車內其實都唔覺得好快, 都係見到窗外風景飛過先知架車速度有番咁上下~~ 車箱幾舒適乾淨, 算是不錯~~
到了下午, 終於去到韶關~~ 即時轉旅遊車去到酒樓吃個午餐~~ 食飽飽就開始觀光~~
我們去了韶關的國家公園, 位於蓮花山 (廣東原來有幾個蓮花山的~). 目標就是山頂的韶陽樓~~ 大家都自費加錢坐高爾夫球車上山, 因為自己行上去要成個幾鐘, 不過沿途都見到當地人自己行上行落~~ 其實上山位置附近仲有個動物園, 不過行程冇包, 導遊當然推說入面冇嘢睇唔駛去
到了山頂, 見到韶陽樓了~~ 望落好新淨, 原來係呢幾年新建的~~
入去睇睇先~~
原來新塔包住了舊塔的遺址, 古樓原來不太高, 而且很久以前已經沒有了, 後來有人找到它的地基同古物, 於是決定重新建塔, 打造為韶關的新旅遊景點, 大陸人的作風就是如此~~ 正中間那塊石碑就是古塔的文物~~
幸好這座樓都有可取之處, 就是可以居高臨下, 看看韶關市的面貌 - 一個典型的大陸城市~~
可能幾年後這個城市的樣子會好唔同~~
落山之後, 突然聞到香味, 原來有人賣台式紅豆餅, 好多團友都被吸引購買, 我們本來都想, 不過再看看它那個"誇張失實"的介紹, 都係算了...
行程仲包括去一個"民族村", 原來又係在山腳, 去到有民族舞表演, 仲有踩刀同噴火表演, 都ok啦~~ 可能因為收了入場費, 所以他們就冇要我們購物了, 而且那裡的貨物不太吸引哩... (張相入面見到有個小朋友, 唔知係咪表演者嘅仔女, 一有表演就會自動自覺喺後台出嚟, 又要表演埋一份~~)
看完景點同表演, 太陽差不多下山了~~ 不過仲有景點要去~~
這座風采樓有幾百年歷史, 是韶關必去景點之一, 因為就在市中心~
這座樓是紀念韶關人余靖, 就係TBB劇集"造王者"入面視帝扮的余靖, 不過導遊話余靖是北宋時期的重臣, 但係劇集話佢係南宋人, 與史實不符哩...
風采樓附近是步行街, 係韶關最旺的地方, 兩旁好多商店, 例如時裝店、鞋店等, 價錢都幾平, 不過款式普通, 所以逛了好一會, 都冇咩收獲~~
行完步行街已經是夜晚, 看到風采樓著了燈, 樣子不錯~~
附近有商店, 有條樓梯可以行上去, 近距離望一望~~
之後坐車去食飯, 沿途見到有些橋有燈飾~~ 不過夜景不算好繁華~~
食完飯返酒店, 我們的團是住"4星級"的澳城花園酒店, 在一個樓盤隔離~ 房間都幾大, 望落算乾淨, 不過有一兩隻"小強"呀, 而且水煲有好多漬, 好彩附近有超市可以買水飲, 另外成間酒店得一架升降機, 因為另一架壞咗......但求一宿, 要求都係唔好太高~~
下一篇當然係第二日的行程~~
沒有留言:
張貼留言